Socialismu n'estáu puru

Ustedes que son llistos, nun mirarán el deu, sinón la lluna.

La Nueva España (Un disparate educativo) publica güei un reportaxe acerca de la decisión de la Xunta d'Andalucía de prohibir que los maestros recomienden llectures voluntaries o testos de refuerzu. Los que nesi reportaxe contesten pierden de vista la cuestión esencial: nun se trata d'una cuestión d'educación lliteraria, de llibertá del enseñante, de pedagoxía, de nada de nada. 

Trátase d'una cuestión de socialismu n'estáu puru. La razón pola que la Xunta d'Andalucía nun quier que los escolinos llean más llibros que los llibros de testu qu'ella paga dizlo ella misma con claridá: así nun se producen diferencies ente los alumnos y toos tienen les mismes oportunidaes. Na mediocridá, na falta d'interés, na burrez incluso, dirán ustedes. Pues d'eso se trata. ESO YE SOCIALISMU N'ESTÁU PURU, ¿O CREEN QUE YE OTRA COSA?

Yo recuerdo, por exemplu, cuando en Xixón, nos años 80, entamó la Universidá Popular, la negativa a qu'hubiese un conservatoriu de música en Xixón, o a que s'estudiase y enseñase na UP otru instrumentu que nun fuere la guitarra, porque eso yera popular (y igualitariu): lo demás elitista.

De mou y manera que nun miren al deu: la decisón de los socialistes andaluces nun ye un problema de la enseñanza, ye LA MANIFESTACIÓN BRUTAL Y CENCIELLA DE LO QUE YE'L SOCIALISMU: TOOS IGUALES NA NADA.

¿Ah? ¿Que lluegu ellos manden a los sos fíos a colexos privaos y elitistes? Sí, pero ye pa preparase pa lliberar al pueblu y a la clase trabayadora: ensin xente bien preparao, ¿quién diba ser pa gobernanos y emancipanos? ¿Pa facenos a toos, como diz el programa máximu, "llibres, iguales y intelixentes".