Javier Vega de Seoane y Azapilicueta ye un empresariu estimable y estimáu. La Nueva España publica güei, llunes, 13 d'agostu una entrevista con él.
Na entrevista, cómo non, vine a metese col asturianu, a propósitu de pedir que tolos ñeños deberíen deprender inglés, como elementu imprescindible pal so ésitu y pal ésitu del país. Y entós aprovecha: "En lugar de hacer tanto hincapié en el bable (son incapaces de decir "asturianu" o "llingua", que ye lo que se estudia, lo de "bable" ye yá una confesión), que es un idioma que todos queremos y practicamos (risum teneatis?, decíen los llatinos, o sea, ¿nun vos mexáis de risa?), habría que hacer más énfasis en que los escolares hablaran inglés".
Dalguna precisión: l'asturianu ye obligatoriu en tola enseñanza obligatoria, efectivamente, pero nun lo ye: los pás puen escoyer "cultura asturiana" envede asturianu. Y munchos faenlo. ¿Paez mal esto tamién? ¿Val más que nun sepan de Tito Bustillo o de la catedral d'Uviéu, pero sí del Guggenheim o de les pirámides d'Exiptu?, por un decir.
En segundu llugar, l'inglés nun tien escoyeta, ye obligatoriu. Ye más, hai munchos colexos con una especialidá billingüe, onde parte les asignatures comunes (Ciencies Naturales, per exemplu) danse n'inglés.
Y puedo asegurar que si, en xeneral, los escolinos acaben la ESO y el Bachilleratu sabiendo pocu inglés o sabiéndolu mal, deprenden cien mil veces más de lo que deprenden de l'asturianu.
Que por qué se nos (-yos) da tan mal l'inglés, o les llingües en xeneral. Pues eso ye fariña d'otru costal.
En fin, yo o que don Javier tendrá más conocencia de les demás coses de les que fala (que nun me cabe dulda), o más xuiciu sobre elles.
No hay comentarios:
Publicar un comentario