Pocos pueblos tienen el privilexu de tener esistencia y nome como talos enantes de la llegada de los romanos. N'Hispania, solo los cántabros y nosotros, los asturianos o astures. Y, a cada pocu, apaecen escatafinos d'esi pasáu nuestru, grandiosu yá solo por esistir, esto ye, por qu'hai memoria d'él.Estos díes desurden restos d'una ocupación romana n'Argandenes, L'Infiestu, Piloña (ver por exemplu, equí). Conocíamos del pasáu una lápida de los Astures Argaenticeni, y camentábamos que'l so ñiciu taba nel Argandenes de L'Infiestu. Agora, además de los rastros toponímicos, tenemos indicios d'una importante ocupación romana, que, como otres, ha ser un asentamientu de los "vencedores" sobre l'antigu pobláu o castru astur de los nuestros antepasaos, los Asturi Argaenticeni.
Pues, agora, a esperar y ver lo que sal de les escavaciones. Y, sobre tou, a esperar que los piloñesos nun fagan, como ficieren en Xixón, una estatua al romanu esclavizador, como-y llevantaren en Xixón a Augustu. A Augustu, el que vieno equí a cortar manes y cabeces, esclavizar y vender paisanos, sometenos a toos, llevanos el oro y violar muyeres y doncelles.Al que Xixón, yá digo, agradecíu, púnxo-y una estatua nel Campu Valdés, como "civilizador" nuestru. ¡Velo pa creelo! Asina somos.
