Una gran novela

Una gran novela. El xueves 3 d'esti mes tuve l'honor y la prestosidá de presentar El proyecto Enzensberger, la novela del mio amigu José Luis Fernández López. Amena, variada, d'escenes rápides, con episodios de gran comicidá y otros de gran ternura. Discurre, en parte, dientro'l mundu la enseñanza, con dos trames, una dientro la otra. Como dixe na presentación, con selo, lo más improtante nun son les trames principales, o la principal, propiamente, sinón la escritura, la ironía, el conocimientu del mundu, les escenes, el retratu los personaxes. La novela comparéla con un tren a Madrid: lo importante non ye'l viaxe, que lo ye, sinón caún de los apeaderos, estaciones y paisaxes que vamos viendo al empobinar hacia la capital: disfrutamos de caún d'ellos.

Ñisales, Prunus Pisardii, Prunus cerasifera atropurpurea, El Piles,

Dende hai unos años vengo apuntando l'apaición de les primeres flores nes ñisales o cagarrionales del institutu El Piles, que dan una cargazón de ñisos, cagarriones o piripirulos encarnaos, en sazón allá pa finales de mayu. El nome científicu de los árboles (son dos), ye'l de Prunus cerasifera atropurpurea o Prunus Pisardii. Dende que me xubilaron ye'l mio compañeru y amigu José Luis Fernández López, Pepe, el que me manda eses semeyes. Estes únviameles el 12/01/2022, y señala que salieren peles mesmes feches de la famosa "Filomena" (el nome griegu del reiseñor, masque, propiamente, Filomela) del añu pasáu, que tanta ñeve y fríu traxo. En fin, en tou casu, y como tolos años, les flores de les dos ñisales lleguen col primer aumentu de la llume'l día. Y a partir d'equí entamen les floraciones de munchos árboles. Gracies, Pepe.