Pregón d'Inaciu Galán y homenaxe a Xesús Cañedo

El domingu pasáu entamaren les fiestes de Cenero ("El Cristo de l'Abadía, la primer romería que Dios envía") con un pregón d'Inaciu Galán. Al final del pregón el pregoneru quiso recordar la figura del asturianista, políticu y cultural, Xesús Cañedo Valle, vecín de la parroquia y muertu fulminantemente hai cuatro meses. La memoria dedicó-yla na presencia del vecindariu, que la acoyó con un aplausu bultable, y na presencia de la so viuda, Carmela Saavedra, y los sos fíos Nel y Antón. Dempués entregaren-y una placa homenaxe a la familia. Na tercer semeya, Xuan Pandiella, Antón Cañedo y Inaciu Galán.

Asturianos: nun somos nada

Agora mesmo, Arguiñano y la hermana, Eva:

-¿Viste a ese pastor tan simpático, gallego, que protesta porque el propietario de una casa rural denunció a un vecino que tenía gallos, porque cantaban?

Por enésima vez: gaitiña, gallegos, sidriña. El pastor gallegu, claro, ye Nel Cañedo.

"La fovera". Laude y De romandela

Toi siguiendo De romandela, como tolos domingos. Tán en Sotres y veo que Laude ta un pelín sordu. Tán diciendo-y "la h.oguera" (l'árbol que se llanta pa la fiesta nel oriente) y empéñase en sentir y trescribir "la fovera".

Por ciertu, que darréu sal Nel Cañedo, un de los yutuberos más interesantes y que más verdaes diz sobre'l campu asturianu y sobre lo que reburdien "los especialistes". Ye fíu del mio amigu Xesús Cañedo. Nun saben lo que me presta velu y sentilu.