El blog de Xuan Xosé: Sabino Fernández Campo

1) Nun pensé yo que fuera afalar tantes pasiones y comentarios el mio ensiertu (un pelín coyuntural) sobre don Sabino Fernández Campo. Sorpréndeme (o nun me sorprende). En tou casu, agradezo tolos comentarios.

2) Sólo quiero comentar ún, el primeru, firmáu por "Xastre". Diz asina:

«Pues paezme, Xuan, que nun supo callar dalguna cosina. Estrañame muncho qu'escaecieras les declaraciones que fixo a la escontra de la llingua asturiana, diciendo que taba bien namás que pa falala na intimidá familiar y que además yera un peligru pa la unidá d'España. Que non porque morriera hai que sólu afalagalu. Polo demás, razón nun te falta nel restu la entrada.»
27 de octubre de 2009 12:45

Un comentariu a esi arreyamientu:

a) Nun me gusta facer necrolóxiques con "peros", pa eso, prefiero nun faceles; del mesmu mou que nun me gusta tampoco facer "vivolóxiques" con "peros", con esi mou tan asturianu que ye'l procedimientu perindólicu del "pongo una y quito dos".

b) En tou casu, hai que pensar que los asturianistes necesitamos sumar y nun restar, y que pa qu'Asturies sea grande, como queremos los asturianistes más que naide, son necesarios toos, especialmente los que valgan.

c) Finalmente, salvo colos políticos, que tienen responsabilidaes directes derivaes del so cargu, nun hai qu'enfadase munchu colos que dicen tonteríes sobre l'asturianu o ignoren esa realidá nuestra o desconocen otres. Vamos tener con ellos una postura evanxélica: ¡Perdonalos, porque nun saben lo que faen (nin lo que dicen)!

Al mou asturianu: vamos despedir a don Sabino upando la montera pa saludar la so persona y memoria.

En primer llugar y sobre too, más que por lo que fizo o dexo de facer, porque yera un paisanu. Si ye que soi pa sintetizalo:

1) Porque yera persona de dereches y siguió siéndolo y manifestándolo, ensin caer na combayonería nin la cobardía qu'aparraren a muncha xente de dereches cola llegada la democracia

2) Porque teniendo participao na Guerra Civil nun bandu, siempre pensó que tuvo nel bandu xustu.

3) Porque, pensándolo, talantó tamién que la guerra acabara n'abril del 39, y que nun había ninguna razón pa llevar les sos consecuencies nin los sos odios más allá.

4) Porque supo guardar silenciu en munches coses y llevase sigu los secretos, ensin dexase tentar pa que contase lo que nun quería o nun debía contar. Ello, sobremanera, resulta más exemplar nesti país de chisgarabís, onde tanta xente cuerre qu'esñala a buscar los micrófonos si los micrófonos nun los busquen a ellos. Y ún piensa qu'esti país diría munchu meyor si la mayoría la xente supiese callar dafechu y non bilordiar, como fexo don Sabino.

Valan estes llinies pa, de pasu, da-yos a María Teresa y al restu la familia les nuestres condolencies, que, sélo, son los de munchísimos.