Si vustedes tán de verdá preocupaos pol paru, yá por vós, yá polos de só, yá pol país, convendría-yos lleer les palabres del gobernador del Bancu España (socialista y nomáu por ellos). Nun vien decir nada nuevo, non nada distinto a lo que vienen diciendo munchos economistes d'España, d'Europa y del mundu y de lo que, modestamente, vien diciendo'l qu'esto firma.
Mándolos a esi testu, QUE NUN PLANTEA'L DESPIDU LLIBRE, NIN SIQUIER L'ABARATAMIENTU'L DESPIDU. Fai ver les dificultaes que pa la creación d'empléu y la contratación tien la llexislación actual, en contraste con Europa y otres partes del mundu. Y les soluciones, como se puede ver ellí y venimos diciendo dende fai munchu. Por exemplu, pueden treslladase parte de los costes del despidu al estáu, o facer movible la capitalización de la permanencia nel puestu de trabayu.
Pero la verdá nun importa a naide: ensin responder a lo que diz Miguel Ángel Fernández Ordóñez, Rodríguez corrió a soltar el so REBURDIU habitual sobre el neoconservadurismu. Y, lo que ye más ablucante, a los sos ROSNÍOS sumóse Cristóbal Montoro, el portavoz d`economía del PP, faciendo ecu a los REBURDIOS zapaterinos.
¿Dixe que la verdá nun-y importa a naide? Sí, ye asina: nun-y importa a naide. Y lo que TAMPOCO-Y IMPORTA A NAIDE SON NIN EL PARU NIN LOS PARAOS: NÁ MÁS QUE-YOS IMPORTA'L SO NEGOCIU, LOS SOS VOTOS QUE SON LA GARANTÍA DEL SO SUELDU Y LES SOS GANANCIES.
