Por razones de la cadarma actual de facebook (durante varies hores tuvo sospechando yo qué sé y tenía qu'andar señalando qué yeren tigres, gatos o tabayones pa poder davos les gracies) y pol númeru bayurosu, perbayurosu, d'amigos que me felicitáis, nun soi pa davos les gracies d'ún en ún (con dalgunos pude facelo). Por eso quiero, p'agradecévoslo de tou corazón -vamos decilo con esa vieya espresión-, copiar equí unos versos de Bruno Fernández Cepeda, de la so La enfermedá (nota: que nun la cito porque yo tenga daque malicada o pelona, sinón porque vienen que nin pintaos), que bien-yos cuayaba -pa esti fin y polo qu'escueyo d'ellos- el títulu d'otra obra suya, Felicitación d'unos díes:
Amigu, taba tumbáu
cuandu recibí tos lletres,
les que en mediu de mios males,
llácares y pataletes,
m'asentaren mui al cuayu
y viniérenme de perles,
pos por tuyes un algaire
y un cordial afayé nelles.
Y agora, rescrito y pa caún de vosotros:
Amigu, taba sentáu
cuandu recibí tos lletres,
les que en mediu de mios díes,
de llectures y paseos,
m'asentaren mui al cuayu
y viniérenme de perles,
pos por tuyes un algaire
y un cordial afayé nelles.
Pues eso, gracies de tou corazón a caún de vós, disculpes pa nun ser pa desenguedeyame de los enguedeyos de facebook pa un númeru tan grande y que volvamos saludanos toos cola ocasión munchos años, vivos, sanos y polos.
Y ehí los tenéis a dambos, al autor y al copista
