Neandertales, ciencia, xente peligroso

George Church, un espertu en bioloxía sintética, diz disponer de la tecnoloxía y el xenoma suficiente pa "resucitar" un neandertal, esto ye, pa qu'una muyer tenga un neandertalín.

Al marxen de los riesgos de la madre -los neandertales teníen una cabeza más grande que la nuestra-, ¿imaxinen vustedes los fenómenos de feria que diben ser esos neandertales? ¿Son capaces de camentar el so sentimientu de mosntruosidá, de soledá o de seres manipulaos por otra especie? Y pueden seguir camentando per esi camín, que nun ye difícil.

Pesi a que dellos díes dempués paez que George Church dio marcha a tras a medies, el riesgu sigue ehí: cualquier aspirante a tiranu, cualquier científicu llocu, cualquier egotista con pretensiones circenses puede llegar, nunos años a facer dañu a unos nuevos seres, pol so interés, el so egoísmu, la so llocura, por sacar perres.

Ehí hai un tema perpeligrosu, de derechos y dignidá humana, que requier la xixilancia de los estaos.

Si quieren ver más, pueden ver los enllaces: Numerus stultorum, ¿Babayada o crimen?

L'home de neandertal y nós

Cada vegada hai más evidencies de que la hestoria de la evolución humana ta por escribir. Tanto nos aspectos paleontolóxicos como los de la hestoria de la "humanización" cultural. 

Sobre l'home de neandertal damos equí a cada triquitraque noticies señalando les sos semeyances col homo sapiens sapiens, con nós.

Agora solo quiero recordar que les últimes investigaciones apunten a que los nuestros parientes (colos que compartimos, por ciertu, parte'l xenoma, yá sea per herencia común, yá per amestanza) yá pintaben fai 30.000 años (polo menos). Prebes, por exemplu, en El Pozu'l Ramu (Tito Bustillo), Nerja, Cabezo Gordo, 

Más sobre'l Sidrón y los neandertales

YÁ EMPLEABEN PLANTES MELECINALES

El yacimientu El Sidrón, en Borines, Piloña, nun para de dar noticies. En xeneral, lo que vamos sabiendo ye que yeren como nosotros. Agora, una serie d'estudios sobre la cotra los sos dientes, permítenos saber que tomaben manzaniella y milenrama (Aquillea millefolium), probablemente como melecines y probablemente crudes.

Per otru llau, curiaben a los enfermos, adornaben el cuerpu con pintures y enterraben los muertos. Pa más datos, dir al enllace de La Nueva España y d'ABC que sigue, pero enantes, va permitísemos felicitar a los investigadores asturianos del yacimientu y recordar al profesor Fortea, empobinador del estudiu, col que, por ciertu, el qu'esto suscribe tuvo una relación perespecial personal y de sofitu a los sos trabayos de campu y divulgativos:

• La dieta vegetariana y curativa de los neandertales de El Sidrón (La Nueva España del 18/07/2012)
  
  
• Los neandertales ya tomaban manzanilla con fines medicinales (ABC del 18/07/2012)

Los neandertales yá pintaben, yá facíen arte

Solemos presumir de lo llistos que somos como especie. Ye más, solemos presumir de lo llistos que somos los homes del XXI. Ensin embargu, el mundu nun entama con nós. Yá señalamos equí como, a cada triquitraque, apaecíen datos que nos mostraben qu'otres especies d'homo yá teníen les mesmes capacidaes que nós. Agora l'apaición de la capacidá artística y pictórica treslládase, según paez, a los neandertales (esos que solemos pintar tan feos y con esa carona). Efectivamente, paez qu'una serie de representaciones de foques de la Cueva de Nerja tán pintaes polos nuestros xermanos, los neandertales, fai unos 42.000 años.

Ehí tienen, les pintures. Por cierto. ¡foques!