Paez que nun van modificase dalgunos de los aspectos que se decía diben camudase en relación col votu de los «asturianos foriatos». Vamos decir, previamente, que que’l ciudadanu asturianu que ta fuera temporalmente pueda votar nel so país constituye un derechu elemental y de sentíu común. Que lo fagan asturianos de segunda y tercera xeneración, que nin conocen a lo meyor el país sobre’l que tán decidiendo, nin saben cuála fue l’actuación de los respectivos partíos nin a quiénes en concretu voten nun ye un derechu democráticu, ye «un escándalu democráticu» y, en munches ocasiones, un «escándalu caciquil». La democracia requier l’interés polo votao, la conocencia y el derechu d’esixencia y responsabilidaes.Porque, per otru llau, munchos d’estos votos tienen, na práctica, un tafu «caciquil», porque son los cachicanes de los partíos respectivos los que s’encarguen d’«ayudar» a tramitar el votu nesos países de Sudamérica, países nos que munches vegaes, además, les oficines públiques y l’alministración son lo que son.
Qu’al PSOE-y interesa especialmente qu’esto siga asina nun ye d’estrañar, yá que ehí tien un gran ñeru de votu que consigue coles perres de toos en viaxes y fartures institucionales. Que-y interese tamién a IU, que nin tien votos nin dineru p’atropalos tampoco ye d’estrañar: inxamás saben ónde tán y tracamundien siempre sueños, fantasíes y discursos con realidaes.
No hay comentarios:
Publicar un comentario