Maizales y esconxuros

Bono, "esconxuros", con perdón. Estos dos maizales que pongo equí estremen menos de quince metros y tán en Duz. Como se ve, aparte la electrificación pa los xabalinos (novedá d'estos últimos años), los paisanos acuden a delles invenciones pa tratar d'evitar que pegues, cuervos y otru averíu-yos acabe colos maizales. Como se ve, los métodos son distintos y -camiento- a llargu plazu toos poco útiles, en cuantes les pegues y demás-yos cueyen l'aquel. Con esi porgüeyu, el d'espantar a les volátiles, el propietariu d'un de los maizales pon bolses de plásticu, el del otru, peazos de tela. "Intelectus apretatus discurrit que rabiat", que diz el llatín escolar y macarrónicu, pero, como decía'l momificáu Llenín, "la realidá ye testona", o sea, que les pegues y demás, pasáu'l primer momentu, son difíciles d'engañar, sobre tou, porque-yos apreta la fame.