Ñisales, cagarriones, priripirulos, ñisos, Prunus Pisardii

Dende hai unos años vengo apuntando l'apaición de les primeres flores nes ñisales o cagarrionales del institutu El Piles, que dan una cargazón de ñisos, cagarriones o piripirulos encarnaos, en sazón allá pa finales de mayu. El nome científicu de los árboles (son dos), ye'l de Prunus cerasifera atropurpurea o Prunus Pisardii. Dende que me xubilaron ye'l mio compañeru y amigu José Luis Fernández López, Pepe, el que me manda eses semeyes. Esta ye la primera y única, d'esti añu. Salió'l 02/02/2023. Oros años tamién salen per estes feches, más abundantes. Anque dalgún añu salen enantes. Por exemplu, nel 2014 tengo colgada una semeya de los primeros ñisos el 30 de xineru. La fecha más temprana fue l'añu pasáu. Téngoles asoleyaes, dempués de mandámeles el mio amigu, el 12/01/2022. En fin, en tou casu, y como tolos años, les flores de les dos ñisales lleguen col primer aumentu de la llume'l día. Y a partir d'equí entamen les floraciones de munchos árboles. Gracies, Pepe.