El blog de Xuan Xosé: Furacu

Acaba de morrer Tola, que ye un poco "fía nuestra", de mio y del PAS, como Paca. Yá que fue la nuestra insistencia la que fizo qu'al final se les devolviera a Asturies, frente a munches crítiques ecoloxistes y la so oposición.

Como esti país nun tien memoria (nun hai más que pensar en cómo'l PP diz que ye d'ellos la Llei d'Usu y Promoción del asturianu), equí tán los documentos:

SUMARIOPROPOSICIONES NO DE LEYTEXTOProposición no de ley del Grupo Parlamentario Mixto sobre la devolución de las oseznas "Paca"" y 'Tola" a Asturias (3/178/00016/00627)Respuesta de la Consejera de Medio Ambiente y Urbanismo a la pregunta formulada por el Diputado del Grupo Parlamentario Mixto don Xuan Xosé Sánchez Vicente al Consejo de Gobierno sobre las gestiones realizadas para la devolución de las oseznas Paca y Tola (3/189/0600/03788)
Respuesta de la Consejera de Medio Ambiente y Urbanismo a la pregunta formulada por el Diputado del Grupo Parlamentario Mixto don Xuan Xosé Sánchez Vicente al Consejo de Gobierno sobre regreso de las oseznos Paca y Tola (3/189/0601/03789)

Furacu y Tola

Y esti ye l'enllace del debate pa la so devolución, nel Boletín Oficial de la Xunta:

http://anleo.jgpa.es:8080/documentos/Diarios/PDF/3J025.pdf

Por ciertu, si quieren saber un daqué más, y ver la relación de les dos oses con Furacu, puen ver:

http://www.xuanxose.net/2009/05/y-dempues-tirose-la-bartola.html

Yá saben ustedes que Paca y Tola son fíes míes y del PAS, pues yo, en nome del partíu, punxe los medios necesarios y la insistencia pa que Paca y Tola volvieren p'Asturies y recibieren allugamientu onde güei lu tienen. Y nun crean, hubo que vencer resistencies, les de siempre, les del progreseríu inernacionalista y les del ecoloxismu dalusitieru, "que si pensábamos que los osos distinguíen ónde acababa Asturies y ónde entamaba Cantabria", "que si los osos nun yeren motivu d'esplotación", "que si Perico y Petra", etc. Ello ye que, al final, doña María Luisa Carcedo aceptó gracies a les nuestres presiones e invitaciones (les de mio y les del PAS) y don Sergio Marqués inauguró.

De mou y manera que débesenos a nós la presencia de Paca y Tola n'Asturies (la del osu Yogui, non, ésa débese-y a Areces y al progreseríu socialista) y débennos los puestos de trabayu y les empreses dellos cientos d'asturianos.

El casu ye que, dempués de munchos intentos y d'un añu d'espera, Furacu (¡Vaya nome pa un paisanu!) cumplió, como siempre dixo'l Presidente Revilla que faría (¿Y él cómo lo sabía, si nun ye mala pregunta?). De mou y manera, qu'ennovióse por fin con Tola y, el primer día, dempués de tirar a Tola fue tirase a la bartola.

Ún, de toes maneres, que se siente un poco el pá de Paca y Tola, nun dexa de tar esmolecíu y, como decía'l borrachu allá a les ocho la mañana d'un fríu mes d'avientu, cuando lu vieren agarráu a una farola y como pensatible y -y entrugaren:

-¿Qué te pasa, manín, que paeces dubitatible.

-Hai, home, mante, ye que nun sé qué facer.

-¿Entós? ¿En qué dubies?

-Ye que nun sé si tirar pa La Trapa o seguir pa la Flor de Grao.

Y asina toi yo, como pá putatible, nun sé si esmoleceme pola perda la virxinidá la mio Tola o alegrame de que, por fin, tenga conocío varón.

Con tou y con ello, y tando "pensatible, plasmáu y silenciosu como'l pitu a la vista del raposu" -que decía Teodoro a Diego Terreros-, toi por gritar:

-¡Venga, Pachina, que te toca a ti probar de "el sabor de la tierruca"!

Y pa ver si ye él tamién pa con ello, un "¡Puxa, Furacu!".

Que tanta falta y fará puxar como camudar de nome.

Porque furacu, topar yá lu topara, lo que fai falta agora ye "furar". Que la estremancia ente "furacu" y "furar" ye la mesma que la qu`espresara Camilo José Cela'l día que lu atoparen apigazando nel Senaú y Xirinacs (un mosén amigu, por cierto, de Tarradellas) dixo-y:

-Está usted dormido.

-No, señor -retrucó l'escritor-, estoy durmiendo.

-Es lo mismo -arrepostió'l mosén axostronáu.

- De ninguna manera -refeletió'l gallegu y premiu Nobel-. No es lo mismo estar dormido que estar durmiendo, de la misma manera que no es lo mismo estar jodido que estar jodiendo.

Pues eso, qu'una cosa ye furar y otra tener furacu.

Y yo, ¿rebiyo o toi esmolíu pola suerte de la mio Tola y (espero) de la mio Pachina?

Nota: la semeya tómola prestada de La Nueva España.