Al xulgáu por poner una mesa petitoria

Al xulgáu, por poner una mesa pa pedir firmes pa la matrícula los coches. Si nu lo creéis ye que sois xente de fe y nun queréis creelo.

Homenaxe a don José Antón Magarzo

Esti meyudía inauguramos nel barriu de Roces la cai José Antón Magarzo, mélicu y ciruxanu perqueríu. Al actu asistieren la muyer, Pilar, y los fíos, de los qu'una fexo un magníficu discursu (directu, clásicu, emotivu, col so puntín de gracia) recordando la figura del padre.

Nel discursu tuvo l'atención de da-y les gracies al PAS, na persona de Xuan Pertierra (desgraciadamente, tamién idu), de la so muyer, Marisa y na mía propia, como entamadores y afaladores que fuimos de la recoyida firmes pa da-y una calle. Con too, el méritu al respectu ye de los firmantes y, por supuestu, de la propia persona del doctor, que supo despertar tantes simpatíes y agradecimientos.

Un recuerdu agradecíu pa él, y un abrazu afectuosu a Pilar y tola familia.

Fúesenos Xuan Pertierra

De sópitu, como d'un rayu, fuésenos l'amigu Xuan Pertierra, un piqueru asturianista. Dende mui temprano Xuan entregó la so vida a les sos tres mayores pasiones: la familia, l'abogacía y la patria, Asturies, con tolo qu'ella significa d'amor pola historia, poles tradiciones, pola cultura, n'últimu términu, pol llar y los llares de los mayores, de los antepasaos.

Xuan defendió la so emoción personal y el so pensamientu políticu a lo llargo de munchos años con nosotros, col PAS, ocupando cargos institucionales (Secretariu Xeneral de Xixón, miembru la Executiva Nacional) y de representación política (candidatu a les elecciones estatales y llocales). En toes eses instancies Xuan brilló cola so entrega y el so esfuerzu, entrega y esfuerzu que sólo sabemos cuánto val —especialmente na so continuidá— los que militamos nuna organización política onde nadie vive del erariu públicu y onde cada esfuerzu supón, al mesmu tiempu, en munches ocasiones, un gastu y, siempre, un desgaste.

Nesti momentu emocionáu nel que les imágenes de tantos momentos compartíos polos militantes con Xuan Pertierra nos vienen a la tiesta, nun queremos dexar d'alcordamos de Marisa, la so muyer, y de Xuan, el so fiyu, asina como de la madre de Xuan —yá vilba— y de tola restante familia. A ellos, los nuestros afectos más profundos y el deseú de que los inunde'l consuelu, primero, y, dempués, la esperanza.

Y a ti, Xuan, amigu, nesta llingua que tanto queríes, un abrazu perfuerte y un «ta llueu» de los collacios.