Homenaxe a don José Antón Magarzo

Esti meyudía inauguramos nel barriu de Roces la cai José Antón Magarzo, mélicu y ciruxanu perqueríu. Al actu asistieren la muyer, Pilar, y los fíos, de los qu'una fexo un magníficu discursu (directu, clásicu, emotivu, col so puntín de gracia) recordando la figura del padre.

Nel discursu tuvo l'atención de da-y les gracies al PAS, na persona de Xuan Pertierra (desgraciadamente, tamién idu), de la so muyer, Marisa y na mía propia, como entamadores y afaladores que fuimos de la recoyida firmes pa da-y una calle. Con too, el méritu al respectu ye de los firmantes y, por supuestu, de la propia persona del doctor, que supo despertar tantes simpatíes y agradecimientos.

Un recuerdu agradecíu pa él, y un abrazu afectuosu a Pilar y tola familia.

Un llogru del PAS en Xixón y un par de gabites

Fue'l PAS l'únicu partíu asturianu en 72 años que reivindicó'l papel del Partíu Republicanu Federal como defensor de la nacionalidá asturiana y de l'autonomía del país. Fuimos tamién los únicos que "descubrimos" a don Isidro del Río Rodríguez (Tremañes, 1869), el primer alcalde de Xixón de la Segunda República, republicanu federal al que'l PSOE acabó echando de l'alcaldía por demócrata -l'alcalde, non el PSOE-.

Consecuentes con ello, feximos nel so día varios actos públicos en recuerdu de don Isidro del Río y presentamos nel Ayuntamientu varies mociones proponiendo la so reconocencia y que se-y diese nome a dalgún espaciu públicu xixonés.

Güei, por fin, l'Ayuntamientu xixonés acaba de reconocer el papel d'Isidro del Río na vida la nuestra ciudá, dando-y el so nome a un xardín na cai Puertu Vegarada.

Per otru llau, tanto'l PAS, personalmente, como yo, contribuimos a honrar prósimamente les cais de Xixón col nome de dos personaxes destacaos na vida ciudadana de los caberos años, l'industrial Alfredo Liñero Rivero y el mélicu-ciruxanu José Antón Magarzo.

Ellos hónrennos a nós y nós honrámonos cola so memoria.