De sópitu, como d'un rayu, fuésenos l'amigu Xuan Pertierra, un piqueru asturianista. Dende mui temprano Xuan entregó la so vida a les sos tres mayores pasiones: la familia, l'abogacía y la patria, Asturies, con tolo qu'ella significa d'amor pola historia, poles tradiciones, pola cultura, n'últimu términu, pol llar y los llares de los mayores, de los antepasaos.
Xuan defendió la so emoción personal y el so pensamientu políticu a lo llargo de munchos años con nosotros, col PAS, ocupando cargos institucionales (Secretariu Xeneral de Xixón, miembru la Executiva Nacional) y de representación política (candidatu a les elecciones estatales y llocales). En toes eses instancies Xuan brilló cola so entrega y el so esfuerzu, entrega y esfuerzu que sólo sabemos cuánto val —especialmente na so continuidá— los que militamos nuna organización política onde nadie vive del erariu públicu y onde cada esfuerzu supón, al mesmu tiempu, en munches ocasiones, un gastu y, siempre, un desgaste.
Nesti momentu emocionáu nel que les imágenes de tantos momentos compartíos polos militantes con Xuan Pertierra nos vienen a la tiesta, nun queremos dexar d'alcordamos de Marisa, la so muyer, y de Xuan, el so fiyu, asina como de la madre de Xuan —yá vilba— y de tola restante familia. A ellos, los nuestros afectos más profundos y el deseú de que los inunde'l consuelu, primero, y, dempués, la esperanza.
Y a ti, Xuan, amigu, nesta llingua que tanto queríes, un abrazu perfuerte y un «ta llueu» de los collacios.
2 comentarios:
Un gran paisano. Yo tamien lu conocia , disgusteme muncho cuando lo llei esta manhana.
Si que yera buen rapaz, porque por encima de todo era buena persona. Yo formé parte de aquella xente que trabayó en el PAS durante unos cuantos años y Xuan era uno de los politicos mas prometedores que esta Asturies nuestra tuvo. Que en paz esté.
Quiero dar mi mas sentíu pesar a la familia.
Publicar un comentario