Marta, Natalia y Nuria: ¡Almiratibles!

Dende fai años, especialmente dende l`añu pasáu, venía apostando por Marta Domínguez y, perespecialmente, almirándola.

Esa constancia suya, esi esbrexu permanente, esa discreción nos trunfos y ánimu nes derrotes facíen que clisase delantre la so persona, sobre tou, porque, además, lo suyo nun yera tar por tar: tenía ésitos bultables. Y tou ello, pa enriba, dientru d`una figura con dos virtudes: la evidente pa toos, la so figura y color de pelu; la menos evidente pa munchos, el so calter castellanu, silenciosu, sufridor, trabayador, delidiador. Y, además, con esi tonu de voz, con esi cantar, que recuerda tanto la de los celtes, esto ye, la de la parte centru-oriental d´España: Palencia, Soria, Aragón.

Nel caberu añu Marta dionos, sobre tou, una nueva satisfación: decidió dexar los 5000, onde tenía acollechao tolos ésitos mundiales y del mundu, y pasase a los 3000 obstáculos. Toos pueden recordar, per otru llau, cómo con carencies técniques, falló nos últimos 300 metros, zapicando nel últimu obstáculu cuando diba ente les tres primeres. Zapicó y cayó. Pero llevantóse y nun lloró; nun echó la culpa al mundu, nin al cambiu climáticu, nin siquier al PAS. Dedicóse a meyorar la so técnica y a trabayar.

Y ehí ta: campeona del mundu.

Noragüena, Marta. ¡Gracies, Marta!