Cuenta el mio amigu Xuan Bello (EL Comercio, 11/01/09) cómo nuna ocasión, na metada d'una reunión social, Ángel González (el poeta, non "el revolucionariu") acercóse a él y, nun aparte, entrugó-y: "que qué era eso que pretendíamos hacer con los bables".
Cualquier que tenga cierta edá o un poco de conocencia de la hestoria reciente d'Asturies tien d'alcordase d'aquel famosu artículu "Conceyu bable: la caperuza del ku-kux-klan", asoleyáu nos años 70 na Nueva España y onde un prócer acusaba a Conceyu Bable (acusábanos) de ser nada más y nada menos que la mázcara qu'enmazcaraba un movimientu poco menos que la ETA.
Siempre esa idea de que detrás del amor a la patria tien qu'haber una estremada negatividá, una voluntá violenta.
Pero esa idea nun reflexa la realidá, espeya, más bien, la mentalidá del que la diz: ye tantu'l so ascu hacia tolo asturiano, el so tarrecimientu de lo que son la nuestra cultura y la nuestra identidá, que nun talanta que naide pueda quereles, querer a Asturies, sinón ye por otros escuros motivos.
Pero les palabres d'Àngel González (magníficu poeta, ensin dulda) ponen de relieve lo que ye l'actitú, lo que fue l'actitú hestórica d'una parte importante de la sociedá asturiana onde s'amesten señoritos y intelectuales, la idea de qu'Asturies ye lo que digan ellos; más: qu'Asturies son ellos (que son precisamente "la non Asturies", "la negación de l'Asturies identitaria"), y, poro, el so tarrecimientu, la so rocea, el so malestar, el rechazu a que pueda esistir otra Asturies que nun sea la qu'ellos creen que ye y pala que se sienten cola autorización esclusiva pa definir y pa representar de mou y manera escluyente.
En resumen, ye un problema d'autoritarismu y de falta de comprensión de la pluralidá. Y, por supuestu, de falta d'amor a la cultura asturiana, de la que tienen la mesma visión que podía tener un marcianu.
Ye esa asturies Asturies, que vivió, que vive y que tien la so másima representación nel Gobiernu (¿asturianu?).
2 comentarios:
A vegaes peme que tolos asturianos somos estraterrestres y caún d'un planeta distintu.
Siempre me presta lleete, amigu.
Xuan: toi d'alcuerdu con Rapiega. Equí extraterrestres somos toos. Dame la impresión, con too y con eso, que nun consiguí tresmitir nel artículu que tan candialmente cites la mio impresión d'Ángel González y la so posición sobre l'asturianu. Ye verdá qu'él, pola amistá verdadera que tenía col matrimoniu Alarcos, sumárase --cuido qu'acríticamente-- a la teoría de los bables; pero tamién ye verdá qu'en nengún momentu de les veces que falé con él defendió con vehemencia tal teoría.Simplemente tresmitía lo que dicía Emilio Alarcos, una persona a la que-y concedía total creitu, y preguntaba qué pensaba yo sobre eso.
Anque te pareza chocante, Ángel González sumóse a esa teoría por asturianía, por sentimientu de pertenencia a una tierra y non a una clas social determinada (eso que dices de los burgueses y los intelectuales); creo que ye un poco más complicao. La única manera que tuvo Ángel de volver a Asturies foi la puerta que-y abrieron, cola so amistá, Emilio Alarcos y Josefina Martínez. Si estes persones nun lu recibieran, duldo muncho qu'Ángel González volviera per Asturies, onde malapenes tenía otra cosa (y neso parezse a nós) que la memoria y el natural amor qu'una persona bien nacida siente por sitiu onde se crió.
La última vez que cené con Ángel González y Josefina Martínez, en Casa Conrado, falóse n'asturianu (Josefina diría que nel castellanu d'Asturies chiscáu d'asturianismos); pero de lo que nun hai dulda ye que se cantó n'asturianu. Ángel González yera un gran amante de la tonada (y Josefina Martínez, por cierto, tien bien bona voz). Xuan, ye muncho más complicao l'análisis y, vencíu y desarmáu l'exércitu roxu que tu lideresti y al que tuvi la honra de pertenecer, ye hora de poner les cartes sobre la mesa. ¿Qué fiximos pa que xente tan notable como Ángel González se punxera en contra? ¿Cómo ye posible que la meyor interpretadora del asturianu dende la perspectiva estructural --a mi el Bable y castellano en el concejo de Oviedo sigue respigándome-- liderara la "reacción anti-asturiana"? Yá sé que tu nun fixisti nada, y yo tampoco, pero toos dos sabemos mui bien quién lo fixo. ¿Les batalles perdíes por otros, y qu'amás nun díbemos más que perder si les ganaren, son la nuestra herencia? Coño, sí: ye una manera de ser asturianos.
Publicar un comentario