Sánchez Vicente: «URAS-PAS aspira a ganar les elecciones»
La coalición Unión Asturianista (URAS-PAS) presentó esti 20 de xineru n'Uviéu a Xuan Xosé Sánchez Vicente como candidatu a la presidencia d'Asturies. El políticu dixo que los nuestros representantes na Xunta Xeneral trabayen según lo que manden dende Madrid, polo que la so formación aspira a ganar les elecciones y solucionar los problemes d'Asturies. «Esperamos dar satisfacciones a los ciudadanos y ser la fuerza mayoritaria», indicó.
El políticu xixonés va encabezar la llista d'URAS-PAS porque según los alcuerdos d'estes formaciones tocába-y al Partíu Asturianista escoyer al númberu ún de la so llista electoral. Asina lo esplicó Javier López Alonso, presidente d'URAS, que compareció en rueda de prensa xunto al candidatu de la coalición y Fernando Esposito y Xesús Cañedo, secretarios d'URAS y del PAS, respectivamente.
Alonso dixo que la coalición surde del deséu de les dos fuercies d'anteponer los intereses de los asturianos a los intereses de los dos partíos. «Ye una forma d'entender la política con coherencia, responsabilidá y capacidá pa desarrollar un proyectu políticu asturianista, asturianu y pa los asturianos», afirmó.
Sobre'l programa políticu comentó que si llegaben al poder diben rebaxar el númberu de conseyeríes y altos cargos: «Si tuviéremos xestores bonos nun fadríen falta tantos cargos», indicó. Sobre la política económica de la coalición dixo qu'apostaríen por facilitar a los autónomos la posibilidá de que con creitos blandos garantizaos pol Gobiernu puedan desarrollar los sos proyectos. «Hai que tener en cuenta que los autónomos representen una parte bona del PIB d'Asturies», señaló.
Otra manera, Sánchez Vicente dixo que la candidatura de les dos formaciones ye sólida y tien voluntá de permanencia: «Otros ruempen; nós sumamos. Somos la cuarta fuerza política d'Asturies, con doce conceyales y dos alcaldíes», recordó.
Pal candidatu d'URAS-PAS la situación política del país ye de «gran beneficiu» pa la coalición porque los partíos mayoritarios «son unos inútiles y los ciudadanos van echalos a pataes». Amás, afirmó que la oposición nun taba faciendo oposición y que los votos de la so formación diben ser «los de tolos asturianos desencantaos».
Sánchez Vicente nun quixo referise a la posibilidá de que'l partíu nuevu qu'acaba de formar Álvarez-Cascos pueda restar representación a Unión Asturianista y dixo que nun existe posibilidá de pactar col ex-ministru de Fomentu: «Nós namás tenemos idea de gobernar», señaló. Amás, desque-yos preguntaron por posibles alcuerdos con otres fuerces asturianistes, dixo qu'URAS-PAS taba abiertu a tola xente que quiera sumase al so proyectu.
No hay comentarios:
Publicar un comentario