ORACIÓN AL RISCAR
Carpe diem.
Que la sombra d’ayer nun t’asolombre,
Que l’esperteyu de la lluz pasada
Nun bata enriba ti les ales tristes
Del recuerdu d’aquello que pudiste
Y anguaño yá nun puedes:
Gatiar como un esguil hasta les quimes
Pa recoyer los frutos placenteros;
Salvar los fondigones d’un reblagu;
Llixeru igual que’l vientu,
Subir emprunes cuestes;
Llanzar la flecha de la vista al aire
Y al futuru, ensin temor qu’amiye
Porque-y falten l’impulsu o les fuerces.
Que lo que fue nun sea la medida
Qu’aparre o qu’abluque el presente.
Pon güei y agora’l canon de les coses
Deseables o posibles:
Masque menuda sea,
La rosa que puedes ver y oler esta
Mañana ye la única
Rosa esistente, insuperatibles
L’arrecendor, color y tiez de ella;
Que nun te l’amenorguen o asobayen
La solombra d’antayu
O l’ideal llonxanu y rellumante
Onde nun llega’l brazu anque lu espurras.
Nun aseñardes los frutos meyores
Del ayer, nin la brenga perdía
Alite na to alma la murniura:
Masque silvestres sean
Siempre’l placer total,
non la culuebra,
Amataga nes roses del
presente.
Carpe diem,
Quam minimum victa pridie.
Carpe diem et
Quam
maxime credula postero.
No hay comentarios:
Publicar un comentario