Esto ye, diz munches bocayaes o babayaes, como se quiera decir, Juan Manuel García-Margallo y Marfil.
Cuando'l PP anuncia que nun tien intención de metese na llamuerga de la Constitución, va él y diz que fai falta camudar la Consitución y qu'él TIEN YÁ UNA PREPARADA.
Dempués va a un debate con Oriol Junqueras, ensin encomendase nin a Dios nin al diañu, y contra la opinión del so partíu.
El xueves pasáu, día 19, en 13TV, ANUNCIA que probablemente España va sustituir les tropes franceses en Mali, faciéndose cargu de los sos llabores. Cuando naide-y lo entrugaba, solo pa dáseles de llistu o informáu. Naturalmente, al día siguiente la Vicepresidente, Soraya, tien que salir a desmentilo.
Nel mismu programa desplica qu'hai qu'entender l'asesihadismu européu, porque son xente, los asesihadistes que s'autoaxusticien (no que "s'inmolen"), que vive en "barrios probes y ensin esperanza". Dempués tien qu'intentar mordese la cola del argumentu (neto qu'el perru qu'intenta mordese'l rau) pa desplicar que lo que quier decir nun ye lo que dixo, que nun intenta xustificar l'asesihadismu. Pero, home, si'l desurdimientu del asesihadismu ye frutu inevitable de les condiciones sociales nes que viven los que s'autoaxusticien y maten, eso ye xustificalo.
Dende llueu, sentíu común políticu y prudencia política, dala. Como si-y faltasen un par de patatines pal quilu, o un veranu y parte la seronda, o un par de bones cuchaes.
Enfin, como dixe munches vegaes, si'l PP y Mariano Rajoy quieren llegar a les elecciones tranquilos, val más que nomen a un enemigu como portavoz y coordinador de campaña. Va face-yos menos dañu que los suyos.
No hay comentarios:
Publicar un comentario