L’APRECEDERU
ANTIVACUNES Y OTRES CABECES
TERRAPLANISTES
Abro La NUEVA ESPAÑA y topo un reportaxín con semeya:
cuatro tiendes, cinco persones y un perru acampaos nel parque Isabel la
Católica, de Xixón. Tán ellí en protesta contra les mazcarines hixéniques, les
vacunes y les redes 5G. De mano creo que se trata d’una humorada, xente ocioso
que quier entretenese. Pero llueu infórmome, reflexono y pienso que va en
serio. Recuerdo que poco enantes Miguel Bosé soltaba bocayaes de la mesma mena.
Afirmaba, incluso, que delles vacunes
diben llevar un chip pa controlanos.
¿Ye posible qu’esta xente ignore los millones y millones de
muertos que vamos evitando dende que Jenner atopó la vacuna contra la viruela?
¿El viaxe mundial de Balmis pa espardela? ¿Nun conocieren, siquiera,
sobrevivientes vexigones marcaos pa siempre, como lo fue Moratín? Y yá nun
vamos dicir nada del restu de vacunes que nel mundu de güei lliberen a millones
de persones de la enfermedá, les llaceries y la muerte.
Aleguen el derechu que tienen a decidir si quieren vacunase
(o poner la mazcarina o non). Pero, d’un llau, lo que ta en xuegu nun ye’l so
derechu a escoyer morrer enfermos, sinón el so derechu a facer morrer a otros
por contaxalos. Y, en segundu llugar, ¿creen vustedes que, d’enfermar, diben
retirase, como dalgunos animales, a morrer solos nun descampáu o, más bien, acudir
al dineru públicu y los hospitales pa curase?
Estes cabeces tan peculiares recuérdenme les de los
terraplanistes. ¿Qué piensen estos, por exemplu, que pasa cuando se llega al
borde? ¿Vese el vaciu? ¿Caese? ¿A ónde? ¿Na parte d’abaxu hai antípodes?
D’habelos, ¿sabemos d’ellos? ¿Suben ellos –¿perónde?– a venos? ¿Baxamos nós?
Son preguntes toes que me paez imposible nun formular nel so casu y, que dende
llueu, nun sé cómo se puen responder.
Cabeces extraordinaries, toes elles.
“Hasta que el mundo mejore”,
dicen que van tar acampaos. Por suerte pa nós y pal mundu, ¡va vaga-yos!
No hay comentarios:
Publicar un comentario