Dos notines sobre la moción de censura

(Ayer, en La Nueva España) L’APRECEDERU DOS NOTINES SOBRE LA MOCIÓN DE CENSURA Dicía’l filólogu danés Hjelmslev que’l qu’aspirare a dictador nun taría mal que deprendiese semántica. Ensin llegar a aspiración tala, sí ye verdá que tou políticu que quiera tener ésitu tien que «dominar la semántica», o, n’otres palabres, emplegar el llinguaxe pa seducir, aplacar, dar argumentos a los suyos (verdaderos o falsos) pa combatir a los rivales, etc. Más a les clares: la llingua tien que ser pa él un capote col que torear a los votantes y empobinalos a onde quier o disuadilos de dir ellos a onde, en un principiu, - yos apetecería. Tanto na calle como n’opiniones de comentaristes políticos reprochóse-y a Tamames que «nun presentase un programa de Gobiernu», como se-y reprochó durante’l debate. Pero la moción de censura (art. 113 de la Constitución) nun requier ningún programa de Gobiernu. Nin siquier una esplicación. Ye, cenciellamente, eso: una «censura». Sería abondo con tres palabres: «Nun lu queremos». Lo que sí requier la moción de censura «a la española» ye un númberu de votos pa presentala, un númberu de votos pa ganala y un candidatu pa encabezala. Puntu. Naturalmente, pidiéndo-y un programa, como recursu diatríbicu, desprestíxense al proponente y la censura. Nesa voluntá de desprestixu, el señor Sánchez calificó la moción de «destructiva», lo que, evidentemente, venía oponese, terminolóxica y semánticamente, a «moción constructiva». Pero’l conceptu de «moción constructiva», que nun ta na Constitución, nun tien nada que ver colo que diga la moción (que nun pue ser otra que censoria, esto ye, «destructiva»), sinón qu’obliga a acostinar un candidatu a Presidente pa que, de trunfar, nun quede el país ensin Gobiernu, col Gobiernu vaciu. Evidentemente, la retórica desprestixadora del Gobiernu trunfó ente la xente la calle y los opinadores profesionales. Agora que pa falacies, pa mentires gordes como gochos pa samartinar, los argumentos de les igualitaries sobre los desastres que provoquen la llei Sisí y le llei Trans. Pero d’eso, n’otru momentu.