Engarradielles

(Antiyer, en La Nueva España) L’APRECEDERU ENGARRADIELLES La engarradiella picoteril ente doña Adriana y l’Arzobispu tuvo, como saben, seguidores y nuevos participantes, cola ausencia de dalgunes autoridaes na misa del día 8 en Cuadonga. Esa fecha y la víspera, colos discursos de don Adrián y don Jesús, algamó’l puntu más piqueru. Don Jesús, l’autoridá relixosa, punxo na so homilía un broche retóricu al alderique coles autoridaes civiles. Si non la sintieron en directu, nun la pierdan. Véanla equí https://www.lne.es/asturias/2024/09/08/arzobispo-ausencia-barbon-dia-asturias-107893119.html y la glosa de Mariola Riera .https://www.lne.es/asturias/2024/09/08/arzobispo-ausencia-barbon-dia-asturias-107893119.html La prédica contién un 80% de crítica social y política -incluyía, por exemplu, una referencia a la basura de los macrofestivales- y un 20% de conteníu relixosu y marianu. Nun hai nada que dicir si eses son les preferencies discursives del preláu. Lo que paez fuera de la cortesía y de les ganes d’apaciguar y de facer un día de toos el 8 y un llugar de toos Cuadonga son les referencies despectives a la otra parte de la engarradiella: “No nos falta ninguno de los que declinan entrar en la casa de María ausentándose por razones tan dudosas como extrañas. […] que hay polémicas artificiales y sincronizadas que se necesitan para disimular las carencias, maquillar las vergüenzas y ocultar con distracción las verdaderas intenciones”. Hai más, ¿pero pa qué? Frente a ello, el discursu de don Adrián el día anterior, dafechamente integrador y evitando oblerazos, fue modélicu. Agora bien, énte la opinión pública corriente, ¿quién ganó? Pues nun toi seguru. Barbón quedó bien colos “suyos”, una parte importante la so “ilesia” y los anticlericales, pero a muncha xente que nun ta alliniada y a la que nun-y lleguen los picoterismos arzobispales paeció-y mal l’ausencia en Cuadonga. Con too esto, créanme, pierde Cuadonga como emblema d’Asturies, y va tiñéndose progresivamente de tintes esclusivamente clericales. Por cierto, yá saben vustedes, llectores cultos, que’l cartafueyín Engarradiella’n Covadonga de Pin d’Escola nun tien nada que ver con too esto.