Agradecimientu y sorpresa (04/04/2025)

Agradecimientu y sorpresa. 12.30 la mañana. Doi con una rueda nun bordillu y revienta, ente Marina y Industriales. Mentantu miro pa ella y busco'l seguru, párame un coche con estos tres rapazos y dos neñes. -¿Quies que te cambiemos la rueda? (Ensin dulda, ven a un vieyu un migayín inútil). Nun salgo del mio asombru (lo que son los prexuicios), y dempués d'entruga-yos si yera de verdá, dícenme que sí. Baxen y pónense a ello: quítenme bultos del maleteru, bisquen la rueda de repuestu, saquen el gatu y cámbienla. Con entusiasmu y disposición. Naruralmente, di-yos les gracies. Entrúgo-yos qué estudien y los sos nomes. Tán estudiando en La Llaboral. Dos d'ellos (soi tan malu pa recordar coses) llámense, creo, Juan y Hugo. Siento nun alcordame del terceru y prestaríame que, si ven esto, que me lo dixeren. Y pa cumplir col adaxu que diz que "nun hai ninguna buena acción que nun tenga'l so castigu" regálo-yos unos llibros que llevo en maleteru. Agradecíu y encantáu. Si me dicen el nome del terceru, prestaríame, y si se ponen en contactu invítolos a daqué. (La semeya los tres dempués del cambiu de rueda. Les neñes nun quisieron ponese). PS. Cuando llevo yá tiempu rodando llámame'l seguru p'ausiliame.