Un cuentu asturianu

(Ayer, en La Nueva España) L’APRECEDERU UN CUENTU ASTURIANU Yera una vez un Gobiernu que presumía de que los sos impuestos yeren especialmente afalagadores pa les clases medies y baxes. El Gobiernu mirábase toles mañanes al espeyu y dicía-y: “espeyín, espeyín máxicu, ¿habrá daquién nel mundu más progresista y mirador polos trabayadores que yo?”. Pero, d’esmenu, el sueñu esvanecióse. Como na décima calderoniana, “mas al volver la cabeza, halló la respuesta viendo” qu’otru Gobiernu, tamién socialista, el catalán d’Illa, baxaba los impuestos más qu’él. La rebaxa illesca dexaba a Asturies colos tipos más altos (10%) pa les rentes más baxes. Y anque’l Presidente siempre presumía del progresismu socialista y sopelexaba que “la vía fiscal asturiana favorecía a ocho de cada diez contribuyentes”, viéronse obligaos a anunciar inmediatamente que poníen en marcha "una modificación de los tramos [del IRPF] para beneficiar fiscalmente a la mayoría social, a las clases medias y trabajadoras". Bien, y al marxe de lo que sea la nueva fiscalidá más progresista (pal 2026, ver veremos), dalgunes verdaes de lo qu’hai: la fiscalidá asturiana beneficia malapenes a cinco de cada diez contribuyentes, non a diez. Hai 26 tipos de deducciones autonómiques, la mayoría son pa situaciones mui rares (por exemplu, si’l primer fíu nacíu ye de partu múltiple), esto ye, d’escasu usu. N’Asturies, como vienen padeciendo ustedes, súbennos los impuestos tolos años, a lo raposo. Al nun deflactar la inflación, perdemos perres porque vienen a cobranos más, anque nominalmente’l porcentaxe sea’l mesmu. A toos, ricos y probes. Per otru llau, ente izquierda y derecha hai una visión estremada sobre los impuestos: mentantu la derecha atiende al bolsillu del que se-y saquen les perres, la manzorga mira pa ónde van eses perres. Y d’esi mou, los diputaos izquierdistes que nun son del PSOE yá anden reclamando que, si s’eliminen esos impuestos a les rentes más baxes, hai que subilos (más) a les rentes más altes. Esto ye, esti cuentu acabóse pero entama otru.