Acabóse la seca

(El llunes, en La Nueva España) ACABÓSE LA SECA La de vivienda. Tantos años ensin llover una. Per tol territoriu español. Per exemplu, les prometíes en Campamento, en Madrid: 10.700 por Zapatero en 2006, les 12.000, ellí mesmo, de Sánchez en 2022, o los 10.700 pisos de xineru de 2026. Nin una, en tou esi tiempu. Nin les 900 pa mozos de Carraclaca, en Murcia. O les 183.000 de Sánchez, compromisu cumpliu mui perbaxu. Podíemos siguir per caúna de les autonomíes o ciudaes españoles. O señalar causes varies, como los cientos de miles d’elles que nun se puen llevantar o entregar pola falta capacidá de la rede llétrica. Asina que seca total durante décades. ¡Pero, ai amiguín, de repente acabóse la seca y entamen a llover cientos, miles de viviendes! Asina, de golpe. Per exemplu, y vamos centranos solo equí, n’Asturies. Candás: 300 viviendes, dempués de 15 años ensin construcción. Villaviciosa y Uviéu: el Gobiernu va promover la construcción de 300 viviendes públiques d’alquiler asequible. Más: el Gobiernu anuncia qu’hai 600 pisos en construcción y que, darréu, van añadise nueves promociones. Pa enriba: más promociones en Sotrondio, San Martín y Avilés, 275 viviendes en total; y otra en Ribeseya y… ¿Yá tán llevantaes? Non, ¡nun emburrien! ¿Y cómo se llogró esta lluvia, esti bastiazu? ¿Hubo qu’acudir a rogatives, sacando los santos en procesión y recitando preces pa impetrar la lluvia? Non, bastó con sacar les urnes, con anunciar que se sacaben. ¡Si serán milagroses! Y nun acaba equí la cosa. ¿Nun había médicos? Pues tamién caen del cielu. La conseyera del gremiu, la señora Saavedra, anuncia la creación de 19 nuevos equipos pa que nun hebia esperes de más de tres díes. Claro que siempre tán los de la cáscara amarga, asina’l sindicatu Sicepa-Usipa diz qu’esa contratación de 19 médicos de familia ye un "anunciu publicitariu". En cualquier casu, prepárense pa ver un auténticu diluviu de perres, contratos, viviendes y carreteres les próximes selmanes.