Un premiu: Estudio de la metáfora imperfecta en el canto VII de la Eneida

Un primer premiu, del Preu d'aquella. Un amigu, Luis Félix Castro Fernandi, faeme entrega d'una revista de 1966, Horizonte Astur, del Real Instituto Jovellanos, onde yo estudiaba Preuniversitariu. La revista recueye dos premios que me dan aquel añu, un cuentu "La duda", que tien un accésit porque se declaró desiertu'l primeru, y un primeru pol "Estudio de la metáfora imperfecta en el canto VII la Eneida". Pongo equí les cuatro páxines del "Estudio de la metáfora imperfecta en al canto VII de la Eneida". (Nota: requier ciertu valor).

Sunt lacrimae rerum

De la famosa frase virxiliana sunt lacrimae rerum (Eneida, I-462) hai delles interpretaciones y, polo tanto, traducciones. Van dexame equí facer la mía.

El contestu, según se sabe, ye la llegada d’Enees a Cartago. Venus ocúltalu a él y a Acates  nuna ñube pa que puedan percorrer la ciudá ensin que los vean. Escapaos de la reducía a murueques Troya, nin Enees nin los sos compañeros saben cuálu va ser el recibimientu nesti país estrañu.

Nesi paséu pela ciudá ven un templu y nél pintaes escenes de la guerra de Troya, la fama de la cuala corrotóse pel orbe. Ehí apárense y, lloramingosu, diz-y Enees a Acates que la tierra está enllena de los sos sufrimientos (de los troyanos). Enantes, el narrador de la Eneida acababa de decir que, al ver les pintures, «entamaba a tener esperanza de salvase, y a enfotase en que diba camudar el so infortuniu».

Y ye agora cuando-y diz a Acates:

Sunt hic etiam praemia laudi;
sunt lacrimae rerum et mentem mortalia tangunt.
Solve metus; feret haec aliquam tibi fama salutem.

Equí entovía hai recompensa pal méritu:

Prevóquen-yos llárimes les histories y les desgracies humanes tóquen-yos el corazón:

            Refuga’l to temor. Esta fama va ayudar un daqué a la to salvación.

                O, en castellanu, con llixeres paráfrasis:

            Aquí, al menos, encuentran recompensa los actos meritorios:

Las historias los incitan al llanto y las desgracias humanas les tocan el corazón.

            Desecha tu temor. Esta fama en algo ayudará a tu salvación.

Giovanni Battista Tiépolo, Venus apaézse-y a Enees  na costa de Cartagu.