A propósitu del mio ensiertu del 22/04/09, fechu con motivu de la presentación en Xixón del llibru Llingua, clase y sociedá, llámame Luis Benito García Álvarez. Nel ensiertu yo manifestara que'l so artículu "El demonio rojo. La representación de los obreros en la literatura burguesa y fascista" ocultaba la realidá y manipulaba la verdá, yá que, nel mesmu, la “demonización” del chigre y del alcoholismu de los obreros apaecía como una tema de la derecha pa conseguir operarios qu'anduvieren más derechos (en tolos sentíos) y que, en consecuencia, trabayaren bien y, asina, poder esplótalos más y saca-yos meyor les plusvalías.
Tocántenes a eses palabres asoleyaba yo que tamién la izquierda fexo continues campañes d'hixene y antialcoholismu, pidiendo tamién el cierre les tabiernes, porque, decíen, ente otres coses, que valíen pa saca-y al obreru les plusvalíes que se-y entregaben col salariu. Y –añado agora-, podíamos sumar lo que pensaben de los chigres y les moñes les muyeres de los trabayadores, que cuántes vegaes veíen que nun llegaba un duru a casa. D'esi mou, afirmar qu'eses campañes yeren “demoniaques” campañes de la derecha ye contar una mentira por contar sólo una parte la verdá, yá que la manzorga tien una llinia continua de puritanismu, que, entamando nel XIX, llega hasta Elena Salgado.
Luis Benito aclárame dos coses: la primera, qu'esi efectu nesi artículu dase porque esi ye la llimitación del tema talu como-y lu pidieren, lo que sigue ensin desplicar nada, y , la segunda, que él ye especialista na materia, lo que me presta afitar, señalando que, por exemplu, ye autor d'un llibru d'ésitu, Beber y saber: una historia cultural de las bebidas. Polo demás, préstame la conversación con Luis Benito y señálolu como exemplu poco frecuente y almiratible de tratu y cortesía, nesta Asturias d'indiferentes, montesinos y fociconos.
Polo demás, tengo que volver a sorrayar que la izquierda n'Asturies fue siempre contraria (ENEMIGA, vamos decilo claro) a cualquier reivindicación de triba cultural peculiarista, asturianista o nacionalista, como, polo demás, fuelo en toa España y en tol mundu, con pocos matices y dala excepción. Eso sí, con trampes y hasta con puñalaes a los suyos si facía falta, como puede comprobase na páxina 238 del citáu llibru, nel testimoniu de Xesús Redondo Abuín sobre'l comportamientu de Carrillo con Santiago Álvarez nel Congreso del PCG del 1978 (por ciertu, Carrillo nun sólo fue siempre enemigu del asturianu, sinón que se mexaba de risa si-y decíen qu'Asturias podía tener derechu a un Estatutu).
Y esa sigue siendo, en xeneral, al marxen del discursu políticu de los xefes, la de la xente de la manzorga qu'actúa embaxu la premisa qu'habitualmente guía'l discursu de la xente d'esa Ilesia: “dame un tópicu col que pueda describir el mundu, y nun me fagas pensar, nin velu como ye”. Y esi tópicu, nesti casu, ye. “nacionalismu = dereches, reaccionarios”, cola variante “cultures rexonales = pequeña burguesía, derecha, reaccionarios”.
Polo demás llama, nel llibru, notoriamente l'atención el contraste ente'l nivel de conocencia de les realidaes nacionales en Galicia, Euskadi y Cataluña y el d'Asturies. No que cinca a la llingua, salvo l'artículu de Faustino Zapico Álvarez, les demás ponencies naveguen na rexón nefelibática comprendida ente la estratosfera y la lluna. Y con tou y con ello, el trabayu de Faustino Álvarez nun fai más que repetir l'esquema y los datos que yo trazara yà fai tiempu y que después desendolcó, con tanta xera y brillu, Pablo San Martín.
Al respective, yá va siendo hora de que la Universidá asturiana se centre n'Asturias y entamen a publicase los datos concretos de la manzorga asturiana sobre esos dos temes: llingua y cultura asturiana, y autonomía asturiana. Los documentos de los partíos, digo yo, tán ehí.
Van dexame, ensin embargu, sorrayar una cosa: hasta 1996 el PCE (o PCA, o IU) nun apoya la cooficialidá del asturianu.
¡Como pa qu'agora nos vengan contar fantasíes y –y echen la culpa a Franco, o sea, a Pachu!
Vengo de la presentación de Llingua, clase y sociedá. Na presentación, onde falaren Esther Prieto, Rubén Vega, Xulio Viejo y Rafael Rodríguez Valdés (el factotum del llibru), el conceyal Montes Estrada, "Churruca", dixo unes palabres que, sobre perreres, vienen representar les mentires (o mentiruques) habituales de la manzorga de raigón heguelianu centraliegu sobre la so propia hestoria en relación con Asturies. En breve y en cañamina, Montes Estrada caltenía que les fuerces representatives de la clase obrera siempre se preocuparen de la cultura y la llingua de la clase obrera. Qu`esi esfuerzu fuera perimportantísimu na II República y que lu asegotara Franco. Que, dempués, les fuerces polítiques clasistes ("de clase", quier decise) tuvieren tan ocupaes n`echar a Pachu (en "lluchar contra Franco", decía`l conceyal) que nun tuvieren tiempu pa ocupase de la llingua de la clase (de les clases, diría yo, más bien), que decíen representar.
