Mediaos los años ochenta. Furor de Conceyu Bable y los enemigos del mesmu, llamaos a sí mesmos "Amigos de los bables". Muyer curiosa y de posibles de Cornellana, treslladada a Uviéu, casada ellí bien casada y afinecía nos modales y la llingua. Anda yá camín de los cincuenta. Naturalemente, la so posición afálala a tar colos "Amigos de los bables" y escontra esos inventores del asturianu, esos que falen un asturianu qu'inxamás y denyures se falara.
Por dalguna razón vuelve Cornellana, a onde fai tiempu que nun volvía, o quiciabis ye que nun andaba atenta a los carteles de la carretera, qu'agora, sollerte, venteando como'l perru de caza la pieza de los inventos de los "neofalantes", sí amira. Y ye entós cuando pasa por Grao y ve, puestu por Obres Públiques, la Constitución, los inxenieros, Madrid y la so delegación ovetense, ve, digo, Grado.
¡Oh ironía tráxica! ¡Oh xusticia torcío! ¡Oh, gracies, Diosín, qu'escribes derecho anque paeza qu'escarabayes -masque sea nos carteles la carretera-!
¿Qué diz aquella paisana, enantes moza? ¿Qué reburdia aquella vecina de Curniana, agora d'Uviéu? ¿Que boria aquella muyer agora bien casada y afinecida?
¡Cómo "Grado", será "Grao"! ¡Estos del bable, que no saben ni lo que dicen, siempre están queriendo cambiarlo todo! ¡Pues estaríamos buenos!
(Testemuñu y fe: Sixto Cortina)
