El pasaú martes, día 3 de payares, ocurrió en Xixón un sucesu que, al empar del llutu, arrastra sigu l'almiración y acostina l'honor pa dalgunes persones.
Pasó qu'una probe muyer, Aránzazu F.D., de 36 años y con dos fíos, averóse a la mar a l'altura de La Cantábrica, nel muru de Xixón, pa escontra San Pedro, pa coyer un par de botelles d'agua, probablemente pa curiar daqué enfermedá respiratoria.
Ocurrió que la mar, que taba permala, llambióla y arrastróla pa dientru. Pues bien, dos mozos que taben nel Club de Regates, Jaime García-Bernardo y Jorge Rodríguez de Castro, de families xixoneses de tola vida, tirárense al agua con riesgu grave la so vida pa intentar salvala. La mar arrastrólos a los tres pa dientru y ellos dos tuvieren a pique de morrer tamién, mientres suxetaben el cuerpu d'ella pa ver si podíen rescatala con vida y facíen-y un masaxe cardiacu pa intentar facela alicar. Asina tuvieren 20 minutos hasta que los rescataren a los tres, anque a ella, desgraciadamente, ensin vida.
Ye esti un sucesu d'esos, que se dan más de lo que paez, nos que delles persones ponen en riesgu la so vida pa intentar salvar a otra que nun conocen (fízolo, por exemplu, l'hermanu de Quini, Jesús Castro, que perdió la so vida nel intentu, allá nel añu de 1993, na playa de Pechón, en Cantabria). La nuestra obligación, nestes circunstancies ye aponderar a esos dos héroes, Jaime García-Bernardo y Jorge Rodríguez de Castro y honralos públicamente. Al mesmu tiempu, ¡cómo non!, llamentanos pola muerte d'Aránzazu y vestinos de llutu simbólicamente cola so familia y los sos dos retueyos.
