Ye una frase del artículu d'Ignacio Camacho, Delendus, güei nel ABC dixital, Refierse a la "decadencia" de Rubalcaba o al por qué hai esi enfotu en mandalu al desván colos trastos vieyos. Esta ye la frase:
Rubalcaba tenía talento, pragmatismo ideológico y un sentido de Estado fronterizo entre el de Maquiavelo y el de Fouché, pero se había quedado anacrónico porque aún necesita expresarse en oraciones subordinadas.
Y esa ye la esplicación de tola ferviella y de toles rodielles que nos pasen, que tolo que necesite espresase con oraciones subordinaes, tol que necesite espresase con oraciones subordinaes, resulta demodé, molestu, e incomprensible. Non solo nel PSOE, en tola sociedá. Güei tolo que pase de la cagarrutia de la zarrica (que como saben tolos mios llectores, ye'l más menudu de los páxaros), tolo que pase del tuit nun solo ye demasiao incomprensible, sinón que nin siquier se quier esperar a qu'acabe la so elocución.
Pero la complexidá del mundu nun se puede analizar ensin el pensamientu complexu, qu'encloya, cómo non, subordinaes; los matices de la vida, del sentimientu y del pensamientu nun se pueden desentrollar ensin subordinaes, nin se pue tresmitir ensin elles, nin entender ensin elles.
Y eso ye lo que nos pasa: que nun queremos nin sentir de la complexidá del mundu y de la so espresión en subordinaes; que tamos embabiecaos na cenciellez y simpleza del rapacín y la so incapacidá pa tener un pensamientu complexu y emplegar oraciones yá non con subordinaes, nin siquier con coordinaes; que, como'l ñeñu, somos incapaces d'esperar un minutu pa tener lo qu'olivamos por tener. Y si nun nos lo dan, esista o nun esista, emberriacámonos, espatuxamos y glayamos al alto la lleva.
Qu'eso ye la modernidá. Esto ye, lo poco que podemos.
No hay comentarios:
Publicar un comentario