Na llinia de les noveles Wilt de Tom Sharpe, el relatu de Xosé Nel Riesgo ye un continuu dir de disparate en disparate, párrafu a párrafu, llinia a llinia, tanto situacional como oral -nesti aspectu destaquen les "pataes" del principal protagonista (y xefe orgánicu dientro l'Alministración) "Sindo Caleyes".
Dientro lo prestoso, rico y acertao del so discursu llingüísticu, destaca la creatividá abondosa del escritor, con imáxenes, por exemplu, como esta:
La comitiva fúnebre llegara polos pelos a la casona, xustamente nel intre qu'españara la nube con una descarga de rayos que s'espeyaben nes escures agües del Atlánticu como los flaxes nos graderíos de la gala inaugural d'unos xuegos olímpicos (páx. 277).
Una observación, nada más, que yá-y fice al propiu autor en Xixón va unos díes, na inauguración del parque dedicáu a Mánfer de la Llera: quiciabes esi continuu fluir de la risa y lo risible debía abocanar un migayín pa, al escedese, nun provocar nel llector la sensación de fartura y de perda de contactu cola realidá nuna novela que quier ser, al tiempu, una novela de sátira política y lliteraria en clave, onde toles personaxes, o la mayoría, pretenden tener el so trasuntu real.
No hay comentarios:
Publicar un comentario