Ayer pela nueche fallemos los Premios Timón, qu'entama y empobina l'asociación L'Arribada, que lleven Humberto y Maite. L'undécimu Premiu Timón a escritores n'asturianu, l'octavu a escritores en castellanu, el quintu de Cultura Asturiana.
Como nel xuráu tábamos xente de dalgunos años, que conociéramos l'Asturies agraria y el Xixón arrodiáu de güertes y enllenu ciudadeles obreres, salieren dellos recuerdos del pasáu, ente ellos, el cortexu nes zones mui rurales y los candiles o "carburos" (esto de carburu en relación col candil ye yá una cosa moderna).
Ello prevocó dalgunes cites lliteraries, ente otres la de la Hero marirregueriana amechando'l candil na espera del ñalador Lleandru.
Intenté posar na mesa un par de cosadielles sobre'l candil, pero nun yera a faceles amiyar, asina qu'agora cumplo cola mio palabra pa colos comensales de llantales equí.
Estes son les dos cosadielles:
Una cosa pequeñina
colgada de les paredes,
col miringüelu colgando
compromete a les muyeres.
N'aquel rinconín
hai un vieyín
sacando la cosa
poqueñín a poqueñín.
Ñidiamente, la solución a les dos cosadielles ye'l candil.
No hay comentarios:
Publicar un comentario