Abran cualquier informativu, radio, televisión: toos dicen lo mismo, bien a propósitu de les noticies que yá tán pasando (por exemplu, un incendiu, un partíu fútbol), bien de les que van pasar (por exemplu, una gala cine o'l fallu d'un concursu lliterariu): "estaremos mui pendientes". ¡Pero qué rayos ye eso de que van tar "mui pendientes" del resultáu del Madrid-Barcelona, vamos poner, o de quién ye'l Premiu Planeta d'esti añu, o de cómo van evolucionar les lluvies?
¡Pero qué babayada estúpida (que ye pleonasmu) ye esa? Nun tiene que tar mui pendientes de nada. Mui pendiente tien que tar la enfermera que tien al enfermu nuna situación grave o'l guía de la Guardia Civil que ta descolgando a un montañeru y que tien que tar mui pendiente de ónde pon los pies. Pero los informadores nun tienen que tar "mui pendientes" de nada. Nin siquier "pendientes". Les informaciones van llega-yos a la redacción, ensin qu'ellos, nin siquier, les pidan. Y lo único que tienen que facer con elles dempués ye dales o nun dales, valorando lo que tienen ente manes y el restu les informaciones.
¡Yá ta bien de tópicos y babayaes! ¡Toi hasta los mismísmos! Sobre too, al ver cómo se pega d'unos a otros el tópicu.
Yo sí que voi seguir mui pendiente de cómo siguen pronunciando estes frases "sexquipedales" pa enllenar de roíu la comunicación.
No hay comentarios:
Publicar un comentario