Agora que tamos nel trixésimu aniversariu del baltamientu del muru Berlín, pa que "recuerde l'alma dormida y avive el seso e despierte" recordando la verdá, y pa que tamién, los más mozos, especialmente aquellos que creen nel paraísu comunista lo sepian, traigo un par de recuerdos arreyaos a la misma persona, comunista (de los del vieyu raigañu) y asturianista; emigrante a Venezuela, retornáu y empresariu:
Les revistes que veníen de la URSS (la propaganda que venía del PCUS, en castellanu, pa los comunistes d'equí) desplicaben qu'el muru nun se llevantar pa que los ciudadanos del Este escaparen de l'Alemania comunista (que nun queríen escapar, ¡qué diben querelo!), sinón pa que los ciudadanos del Oeste (la República Federal) nun colaren toos pa l'Alemania Oriental, polo bien que se vivía equí.
Y nun yera que lo traxeren los papeles, yera que lo repetíen con enfotu munchos comunistes. Yo conocí a dalgún dellos. A ún, a Aquilino Fernández Abúlez, quiero traelu equí con afectu. Y recordar, pa empezar, que nun yera del PCE, sinón del VIII-IX Congresu. Pues bien, Aquilino (Quilo), viaxó de Venezuela a París pa cha-y en cara personalmente la so traición al comunismu (del "de verdá") cuando'l PCE camudó'l discursu y pasó al eurocomunismu.
A Quilo débe-y muncho l'asturianismu. Collaboró y emburrió nos primeros momentos de Conceyu bable, especialmente de Conceyu Bable Xixón, y siguió enfotáu nel asturianismu llingüísticu hasta la so muerte. Elli punxo en marcha la producción industrial de banderes d'Asturies, y los miles d'elles que se ximielgaren o colgaren durante munchos años salieren de los sos talleres.
No hay comentarios:
Publicar un comentario