¡Cuánto nos presten los prestímanos! Y, acasu, paeznos qu'ellos son una de les maravíes, de la contemporaneidá, del nuestru mundu qu'algamó tantes perfecciones.
Pues bien, como sabéis, estos díes qu'ando escazobiellando pela mio biblioteca volví a lleer les Cartes d'Alcifrón (yá saben, Grecia, IV a. C.), del que vos ofrecí estos díes la carta de la hetaira Filúmene al atuñón Critón y la cita del proverbial Mandróbolo. Pues equí vos resumo una llarguca, la carta de Napeo a Creníades. Cuenta'l primeru al segundu:
[De lo que vi na ciudá] hubo una cosa que me dexó boquiabiertu: un puntu avanza hacia'l centru, coloca una mesa de tres pates y, enriba d'ella, tres platinos. Dempués debaxo d'estos desliza tres regodoninos de color blancu, como los qu'hai habitualmente nes orielles de los ríos. Llueu, unes vegaes apaecía cada regodonín debaxo de cada platín, otres -ensin saber yo cómo- taben toos embaxo unu solu y, finalmente, esapaecieron toos de debaxo y desurdieron na so boca. Dempués que los tragó fizo salir a la pista a los espectadores que taben más cerca y quitó-y a ún de les ñaples el primeru, otru de la oreya del segundu y otru de la cabeza del terceru. Dempués de recuperalos, fízolos esapaecer otra vegada sde la nuestra vista.
¿Quién queda más plasmáu y boquiabieru? ¿quién más esteláu? ¿Napeo al ver aquel prestímanu o nós al ver esti nihil novum sub sole?
No hay comentarios:
Publicar un comentario