Siempre nos contaba mio madre, y si non m'enquivoco sentílo tamién a mio güela y vilo escrito delles vegaes, o sea que ye proverbial, la siguiente historina:
Un paisanu enfermó y prometió-yos a les ánimes (supongo que n'otros relatos el destinatariu será un santu determináu) un duru si curaba. Cuando curó, nun s'alcordaba inxamás de cumplir la so promesa, y si s'alcordaba nun tenía suelto, o tenía que gastalo n'otres coses, o llovía, o nun taba pal pulgar... El casu ye que, diendo un día pela calle, sacó'l pañuelu del bolsu, y, al sacalu, cayó-y un duru del bolsu, rodó y fue colase per una cantariella. Y esclamó entós: ¡Meca!, el duru les ánimes.
Estos díes relleendo les Cartes d'Alcifrón (Grecia, sieglu IV, a. C.), del qu'ayer trescribí la pieza maestra que ye la carta de la hetaira Filúmene al atuñaú Critón, topéme, na carta d'Egialeo a Estrución la mención a un proverbial Mandróbolo, el cual
Yera un avaru que prometió a los dioses un castrón d'oru, lluegu fue rebaxando progresivamente'l so ofecimientu y terminó por nun dar nada.
Yá lo veis: Nihil novum sub sole.
No hay comentarios:
Publicar un comentario