Entiendan que nun lo entendamos

(Ayer, en La Nueva España) L’APRECEDERU ENTIENDAN QUE NUN LO ENTENDAMOS Un individuu dase a la fuga nel automóvil. Dempués de chocar con un coche de policía, intentar atropellar a los axentes y engárrase con ellos, detiénenlu. De too ello resulten dos guardies mancaos. El comentariu del ciudadanu arrestáu ye: «La pena es que no los haya atropellado». Pal encausáu, que tien numberosos antecedentes y el carné retiráu, el fiscal pide prisión provisional, comunicada y ensin fianza. La xueza déxalu en llibertá con cargos y afirma: «No hay riesgo de fuga ni de reiteración delictiva». Choque en Llanes. Muerre una persona nel accidente. El conductor del vehículu que s’estrella col del muertu nun tien carné nin pasó la ITV. La xueza nun ta segura de la culpabilidá del acusáu nel choque, y, polo tanto, de la de la muerte del otru conductor. Conducir ensin carné nin seguru nin la ITV nun ye delitu penal. Recordarán ustedes d’hai pocos meses a una rapaza a la que pillaron reiteradamente conduciendo ensin carné y ensin seguru, y, si busquen curioso, atoparán casos per toa España. Y entós talantarán que nun seamos pa entender bien qué ye lo qu’ocurre nestes ocasiones. ¿Ta mal llexislao? ¿Ta xulgao con escesiva benevolencia? ¿Nun hai forma de poner llímite a eses conductes incíviques y peligroses tan reiteraes? Daquién debería desplicar y, seguramente, los llexisladores intervenir. Porque, amás, el ciudadanu común, que paga los seguros, pasa la ITV, tien el carné, abona los impuestos y les multes, camienta qu’equí hai una situación discriminatoria de fechu. Y, a lo meyor, siente la tentación de facer como Fidel Álvarez, un vecín de los Ozcos que tien pidío al Ayuntamientu una subvención pa comprar un burru, darréu’l mal estáu de la carretera que lleva al so llugar. Asina, pensará, «nun tendré que pagar impuestos nin tener los papeles al día añu tres añu. Y, sobre too, nun sufriré na comparanza colos que nun-yos pasa nada por nun tenelos».