Más: IU, Brad Pitt, Llenín

Vuelvo a preguntar: ¿daquién sintió a IU -socios del PSOE na "Operación Brad Pitt"- entrugase pol quién, cuánto y cómo (n`euros) de la operación? Un silenciu mayor que`l que se percibe nel Sahara.

Nin siquier les aguerrides tropes rañoniegues d`IU n`Avilés, tan dispuestes a movilizase pol agua, dixeren nin gota equí.

A lo meyor ye que toos ellos suañen, confundiendo a Brad Pitt con Llenín, y creyéndolu un enviáu suyu o una reencarnación anunciadora de la llucha final (¿o ye de la "ducha", polo del agua?).

Yo nun descarto que tenga sío Areces, fértil n`armadielles, como Odiseus, el que convenciera a Pitt pa que s`amarutara de Llenín / Armando y pa qu`asina los d`IU, estelaos pola aparición, nun dixeren nin pío.

-A lo meyor -talantó Odiseus / Areces, guañosu n`armadielles-, estos queden ablucaos pensando que ye Llenín y, quién sabe, hasta lu imaxinen que vuelve pa char una partida d`axedrez con Evaristo Valle, y, puestos a suañar, ye fácil que piensen que xuega con Angelina Fociquinos Jolie de reina enriba del tableru (yá imaxinaran ellos cómo la quieren vestir, o desvestir), y entós queden ehí clisaos (¡Pues nun ye caxigalina: Lleín avanzando la mano pa tocar y mover a Angelina-Reina!) y yá nun discurren nin dicen un res.

Y, antainandiegamente, llevantó`l teléfonu y mandó:

-Poneime con Brat Pitt, que tengo que deci-y cómo tien que venir afatáu pa poder yo facer fatos a dalgunos.

Nota: la semeya la manzorga ta tomada de La Nueva España.

Más sobre Brad Pitt "gratis"

Yá saben les entrugues que tamos faciéndonos sobre la venida a Avilés de Brad Pitt (como nos les facemos sobre l`anterior de Kevin Spacey): ¿cuánto costó?, esto ye, ¿quién paga?, ¿quién-y paga? ¿cómo paga? ¿cuánto paga?
O a lo meyor nun paga naide y ye como aquel milagrosu llibru Asturias siglo XXI, pal qu`una serie d`empreses, por sí y énte sí, decidieren reunise, atropar los datos de toles actuaciones pasaes, presentes y futures del Gobiernu del PSOE, poneles nun llibru que pesaba más d`un quilu, a tou color y en papel couché, metese de pasu col Gobiernu anterior y xuntar les perres en secretu pa pagalo too elles?

A lo meyor ye asina.

Y a too esto, ¿los fenómenos de IU? ¿Yá saben cómo se lu llama dende que ta nel Gobiernu?: "el partíu La Rana", pola bocona que tien abierta pa tragar.

Nota. La imaxen ta sacada de La Nueva España.

¿Cuánto costó Brad Pitt?

Yá sé que ye una pregunta antipática, ¿pero cuánto costó Brad Pitt y quién-y pagó? ¿O nun lo pagamos directamente a través de los presupuestos o de sociedaes instrumentales interpuestes, públiques o semipúbliques y va nel costu del estudiu d`arquitectos? Porque los famosos nun van a ningún sitiu ensin cobrar, dende Belén Esteban a Brad Pitt. Toos cobren, igual que, nel so día, cobraría Kevin Spacey por venir a decir que`l proyectu del muséu Niemeyer yera perinteresante, cuando naide sabe qué diaños va haber nel futuru muséu.

Ya sé que ye una entruga antipática, ya lo sé. Pero tamos nuna democracia (a medies, polo menos), y somos persones llibres (dalgunos, polo menos). Asina que ¿quién paga?, ¿quién-y paga? ¿cómo paga? ¿cuánto paga?

Lo demás ye roídu, furia y propaganda.

Nota: la semeya ta sacada de La Nueva España.