Asoleyo equi l'artículu que m'acaba de mandar Xesús Cañedo Valle, dando la so opinión como asistente al Congresu de Cultura Asturiana Mozo.
I CONGRESU DE CULTURA ASTURIANA MOZO. UNA IMPRESIÓN
Por Xesús Cañedo Valle
Secretariu Xeneral del PAS
Celebróse esti 19 d’ochobre n’Uviéu el I Congreso de Cultura Asturiana Mozo. Pal que non tuviera y quixera saber pa que fue y cómo fue y, tamién, si tendría que vover ser, escribo estes llinies, col alvertimientu previu de que son una pura visión presonal; pue acusáseme polo tantu con toa propiedá de “suxetivismu” (espero que en sin purga y reeducación).
Falando de cultura hai primero qu’afitar la premisa de que nun va ser (nun pue ser) un actu multitudinariu; si ye de cultura asturiana, entá más; si a ello sumamos qu’el programa componíase de ponencies o comunicaciones, interesantes y bien feches toes elles, pero de temátiques mui variaes (a unos interesen-yos unes, pero non otres; y al contrariu) l’aforu nun foi, a lo llargu del día, del tou malu, aunque podría ser meyor; un pocoñin más d’atención polos medios en sin duldes meyoraría esti aspectu, pero ya se sabe qu’una cosa ye pidir y otra que te dean.
Más allá del ésitu cuantitativu o cualitativu (públicu asistente sobre públicu probable o ponencies presentaes sobre ponencies posibles, por exemplu) nel mio casu particular llamáronme l’atención dalgunos detalles que podríemos llamar ambientales. Unu: naide s’entrugó qué yera cultura asturiana y qué non; tol mundu asumía una caracterización a priori que, con mui bon criteriu, naide explicitó o quixo definir; ye un bon síntoma de maurez; ye como dicir: ye cultura asturiana porque nun pue ser otra cosa. Dos (más en broma): tol mundu foi d’una educación esquisita; naide m’entrugó (naide s’entrugó) qué facía nun congresu de cultura mozo; ye también un bon síntoma: la urbanidá ye parte de la cultura.
Pero el Congresu sirvió mui bien pa palpuñar otres coses.
Por exemplu, nun se cayó na xeremiada, lo que tamién ye bon síntoma, anque tou’l mundu yera consciente de tar faciendo equilibrios al pie d’un ríu que lleva muncha agua.
Por exemplu, qu’hai muncha xente trabayando nes más variaes estayes, munchos d’ellos con proyectos empresariales serios y bien pensaos, que nun pretenden tener espíritu d’héroes, aunque sí son conoceores de les dificultaes nes que se mueven; otros tán ganando’l sustentu cola so actividá, lo que ye bueno pa ellos y pa la cultura asturiana en xeneral. Aunque tou ello seya en pequeñes proporciones, visto dende les dificultaes intrínsiques, ye un pequeñu milagru.
Por sobre tou, qu’hai muncha xente que tien munches coses que decir y non atopaba ocasión pa deciles; la impresión que sentimos los asistentes yera que los que interveníen tenín ganes de falar, coses que contar, y prestó-yos y agradecieron la oportunidá que-yos dio’l congresu, y paecióme que quedaron mui a gustu por poder diciles; y otru tantu los qu’escuchamos: prestonos tantu o más qu’a los propios ponentes, porque tábamos también naguando que se dixera, que se contara, que se quexara. En resumen, que foi una oportunidá que la xente taba esperando; unos pa decir y contar; otros pa que mos contaren.
En realidá tampocu tien nengún misteriu; la cultura (les manifestaciones culturales) son na so esencia fundamentalmente un actu de voluntá; cuando esa voluntá non s’afalaga (o afalágase pocu) cola retribución que proporciona’l mercáu, ye necesario de tantu en tantu afitala y afitase n’ella.
Na mio opinión esti I Congresu debería tener continuidá; nun sé si tolos años, n’años alternos u otra fórmula, pero debería siguir; habría que talantar si el calificativu mozo ye’l más apropiáu pa sucesives ediciones, y tamién si debería acoyer toles estayes o manifestaciones culturales, o centrase unos años en unes y otros en otres. Son entrugues que deberán facese los entamaores. Pero ye importante que los que tán na xera cuenten lo que faen, una vegada y otra, y pa ello necesítense foros como esti.
