Lleídu'l sábadu 19 d'ochobre, na apertura n'Uviéu (Auditoriu Príncipe Felipe) del Congresu de Cultura Asturiana Mozo).
Fai aprosimadamente un mes, na presentación d’un llibru de
Xuan Santori, Lluis Xabel Álvarez, presente nel actu, alvertíame de que nel
2014, nel añu que vien, van cumplise 40 años del surdimientu de Conceyu Bable y
de l’apaición, polo tanto, del Surdimientu.
Esti Congresu nun se convocó inxamás
pensando nesa circusntancia hestórica, que nin siquier taba presente na
concencia de los convocantes. Pero, ensin embargu, esa consideranza nun ye una
mala ocasión pa facer una reflesión.
Dende
aquella fecha fasta güei, 19 d’ochobre de 2013, el panorama de la cultura
asturiana camudó radicalmente. Lo que quedaba de les nuestres señes d’identidá,
una especie de zalegu del nuestru devenir hestóricu, nun yera más qu’una serie
de costumes y d’actos teñíos de ruralismu, de vulgaridá; presentes delantre la
sociedá como los rasgos d’agonía d’una historia que daba les aboquiaes y que
nun podía tener continuidá nel futuru. Y, lo que ye peor, toes aquelles
costumes y actos, toos aquellos rasgos identitarios, nun teníen cultivadores
enfotaos nellos, y, si los teníen, yeren más una especie de románticos
caltenedores d’un pasáu semimuertu que cultivadores d’un presente que se
proyectase con puxu y calter valiosu hacia’l futuru.
Pero d’entós
p’acá —nuna nueva demostración de que la historia nun la faen los fechos
oxetivos, sinón los homes; de que nun ye inevitable más qu’aquello que dexamos
que lo sea—, les coses dieren un xiru radical. Aquella cultura esfelpeyada,
rural, antiguada, camudóse n’otra cosa. Camudó la gaita na so mesma musicalidá,
camudó, incluso, na concepción del propiu instrumentu, na so afinación y
precisión. Multiplicárense por mil los gaiteros, con una calidá que puede
competir en tol mundu; apaecieren y multiplicárense les bandes de gaites,
d’ésitu hasta en China —y ye lliteral, como sabéis—. ¿Qué tienen que ver la
tonada de güei, el canciu asturianu, col del pasáu; los sos intérpretes y les
sos intérpretes, la so calidá vocal, la so agóxica y el so saber tar enriba les
tables colos del pasáu, más que nel aprovechamientu de lo meyor d’esta
tradición, que se perrespeta, pesie a la innovación? Sería una babayada decir
daqué de la lliteratura o de los lliteratos del presente. Nin el so númeru, nin
la so creatividá, nin la multiplicidá de xéneros y formes, nin la universalidá de
los sos temes y la so escritura pueden sufrir dalguna comparanza col ayer. Y,
al mesmu tiempu, la nuestra cultura y la nuestra llingua normalizárense en
munchos aspectos: l’Academia, la gramática, la ortografía —tan soñaes por
Xovellanos y el so arrodiu— son muestra d’ello. Al mesmu tiempo, multiplíquense
los investigadores de la nuestra cultura y na nuestra llingua, los grupos de
defensa y espardimientu de la mesma.
Non menor
fue el reblagu —l’esñalíu de llau a llau de la vallada, más bien— que supuso
l’apaición d’empreses culturales: musicales, lliteraries; de periódicos y
revistes, gráficos o n’interné; de los grupos musicales de tou tipu de música o
de los cantautores o solistes; d’un teatru y un monólogu que, dende fai munchu,
ye más que l’entrañable y respetable teatru o monólogu costumista. ¿Cómo nun
plasmar, dende la perspectiva d’aquel 1974, en viendo l’espollete de programes
televisivos y radiofónicos, de periódicos, blogs o grupos n’interné, de
software pal usu de la llingua nacional na rede, de la presencia l’asturianu en
tolos niveles la enseñanza, d’asociaciones de defensa y sopelexamientu de la
cultura y la identidá asturianes, de la esistencia d’una llei, la Llei d’Usu, que
tien el so pegollu, a la vegada, nuna declaración estatutaria, la del artículu
4º? Y too ello, además, con una modernidá, una calidá, una universalidá
comparatibles coles de cualquier de les otres cultures. Y, sobre too, cola
aparición d’un grupu numerosu de persones que creen na so cultura, que viven d’ella
y pa ella, que tán enfotaos nel so futuru.
Dexaime la
pequeña presunción de decir qu’el trabayu y la testonería de quien agora vos
fala tuvo un daqué que ver con muncho de too eso.
¿Qu’hai problemes? Evidentemente. ¿Que
les coses nun son tan guapes, prestoses o perfeches como nos gustaría?
Ñidiamente. Pero tou esi camudamientu, esa bayura, esa modernidá, esi esfuerzu,
esa calidá que tenemos nun pueden minusvalorase por pensar no que nos falta.
Pero l’oxetivu d’esti congresu nun ye
facer remembranza del pasáu nin análisis del camín, colos sos pasos, los sos
reblagos, les sos galmiaes. Pero sí ta, ente los porgüeyos del congresu, el
treslladar a la sociedá asturiana toa esa bayura, toa esa riqueza, toa esa
modernidá, esi ser fieles a la tradición pa camudala, actualizala y treslladala
al futuru, esa universalidá; y, ¿por qué non?, conta-y a la sociedá cuánta
xente ta trabayando y ganando’l pan nesos ámbitos, cuántes empreses esbrexen
nelles y, sobre prestar el so serviciu, pretenden ser aniciadores de riqueza y
empléu.
Pero l’oxetivu fundamental d’esti
congresu ye’l de sentivos a vosotros, empreses, trabayadores, creadores nel
ámbitu la cultura asturiana, na universidá y nes enseñances medies y primaries;
trabayadores n’interné, na radio y na televisión; autónomos y empleadores;
investigadores, historiadores, escritores, músicos solistes, músicos de bandes,
músicos de grupos musicales, etnógrafos, xente del teatru, en fin, a esa
pléyade del alma d’Asturies, que, según diría, Bruno Fernández Cepeda, «por ser
iñumerable, ye imposible ñumerala». Xente toa, moza, qu’esbrexáis nel presente
cola brenga y puxu que solo ye pa tener la mocedá. Saber qué pensáis del
presente, cuáles son les vuestres espectatives y llogros, les vuestres
esperances, la vuestra forma d’entender la nación y la cultura, los vuestros
tarrecimientos, les vuestres ilusiones y la vuestra voluntá de futuru.
Por eso equí acaba la mio
intervención, queríos amigos. Porque vuestru ye’l congresu, lo mismo que
vuestru ye’l futuru.
No hay comentarios:
Publicar un comentario