Los misterios de los clásicos resueltos (V): la Vieya Zuna

  Nel Píramu y Tisbe de Marirreguera (digan lo que digan los demás, que canta Raphael) atopamos:

Barruntaba que l'alba fos vecina,

pos de llamaricar la vieya Zuna

lo da' entender les flores que va irguiendo

inchides d'orbayada arrecendiendo.

   ¿Qué ye esa "vieya Zuna" que'l testu pon con mayúscules en "zuna"? Vamos amirar pal contestu: Píramu y Tisbe deciden escapase de les sos respectives cases pela primer vegada (les families, como dempués imitará Shakespeare nel so Roméu y Xulieta, son enemigues y nun los dexen falar). Danse cita delantre'l sepulcru del rei Ninu y ella aporta enantes qu'él, (ente otres coses porque él ye un poco vagucu: Miraba Tisbe al una y otra parte / para ver cuándo Píramu venía, / mas elli madrugaba de mal arte: / yeren les dos y media y aun dormía). 

   Ye entós cuando se pon a entretenese faciendo un ensarte de flores y barrunta... ¿Qué significa entós, como decimos, la vieya Zuna? Pues, nin más nin menos que'l Sol. Vese claro nel testu: ya se van poniendo de pie les flores y entamando a arrecender, les flores que taben enllenes de la rosada o orbayu (y, polo tanto, un tanto aparraes pola muga). Eses novedaes son señal, percibe Tisbe, de que yá va llegar el sol, l'alba meyor, de que yá va llamaricar (llamear pero un migayín entá, seliquino) l'astru rei, que tien la zuna dende siempre (zuna vieya, polo tanto) de volver a apaecer dempués de la escuridá y la orbeyada de la nueche.

   ¿Que ye apropiao o non lo ye llamar al sol Vieya Zuna (n'epítetu, atención, non en posición subconxuntadora, esto ye, detrás del sustantivu)? ¿Que ye demasiao conceptuosa la metáfora? ¿Que quiciabis vien obligada pola rima, con lluna? Bueno, pero en tou casu, que nun se nos escaeza que Marirreguera ye un clásicu, pero un clásicu del Barrocu.

De mou y manera que tendríamos qu'escribir:

Barruntaba que l'alba fos vecina,
pos de llamaricar la Vieya Zuna
lo da' entender les flores que va irguiendo
inchides d'orbayada arrecendiendo.