Al marxen del conteníu real de la investigación sobre la UXT

Al marxen d'ello, de lo que pasa y d'aquello no que termine, tó apuntar que'l nome clave de la operación de la Guardia Civil na sede de la UXT n'Uviéu fue SUMICIU.

Hailos con inxeniu y humor. (Y a lo meyor ello ye una gabita pa la oficialidá del asturianu).

Tomada de La Nueva España

El negociu ye'l negociu

Na reunión que tuvieren el martes 31 nel Ministeriu d'Industria, UXT y CCOO anduvieren a piques de llevantase de la mesa porque también s'invitara al tercer sindicatu, USO. Los dos sindicatos considerárenlo "una provocación" y tan estudiando llevar a xuiciu al Ministeriu por invitar a USO a la reunión (encuentro en el Ministerio (LNE).

Imaxen de la reunión nel Ministeriu. Tomada de La Nueva España

Nun crean ustedes que ye la primer vegada, ye siempre, uquiera qu'hebia una reunión d'esta triba. Porque, perriba los intereses de clase, de la defensa d'un sector económicu, de la del proletariáu, o cualquier otra caxigalina, ta lo principal: EL NEGOCIU.

Y ehí sí qu'hai que ser firme: si nun dexamos a naide más entrar nél, tocamos a más: poder, subvenciones, cursos de formación..., negociu.

Esi ye'l principiu fundamental de cualquier acción reivindicativa, de cualquier política de clase, de toa mentalidá revolucionaria: "EL NEGOCIU YE'L NEGOCIU".

¿Pa qué sirve la ONU?

¿Pa qué sirve la ONU? Yá vemos qu'en Siria el dictador mata miles de compatriotes tolos díes. Ensin embargu la ONU ye incapaz de tomar decisiones porque lo veten Rusia y China.

Val. Eso nós yá lo sabíemos. ¿Pero por qué nun sentimos agora a toos aquellos -enxertos partíos como PSOE y IU o sindicatos como UXT y CCOO- que decíen que la ONU yera'l centru de la paz mundial y que debía ser el gobiernu del mundu? 

¿Por qué callen agora? ¿Por qué nun ocupen les calles manifestándose? RESPUESTA: porque nun-yos esmuelguen los crímenes nin los muertos, solo los americanos.

¿Por qué nun dice nada sobre la inutilidá de la ONU? RESPUESTA: porque igual-yos da que se útil o inútil, solo tienen interés n'utilizala contra los intereses occidentales (nun solo estadounidenses).

Esto ye, porque son lo que son, y esa ye la so verdá central y fundamental.