Cagarriones n'El Piles

Semeyes de cagarriones. El cagarrional, prunal o piripirular ye una Prunus Pisardii o Prunus atropurpurea, de los dos que tán xuntos a la entrada del IES El Piles. Como puede vese, xunto colos cagarriones normales, l'árbol presenta, como tolos años, frutos partenocárpicos, no que paez ser más una anomalí l'árbol qu'una cuestión coyuntural, d'añada.

La desplicación de los frutos partenocárpicos dímosla nel 2011, gracies a les informaciones del inxenieru agrónomu Álvaro J. Morilla Fernández, padre d'una escolina a la que dende equí recordamos y a la qu'esperamos que-y vaiga too bien.

La semeya, del 09/04/13.

Cagarriones y frutu partenocárpicu n'El Piles

En pocos díes (les semeyes son del 16/04/12) los cagarriones d'el IES El Piles nun solo s'enllenaren de fueya, sinón de frutos, como puede vese nestes semeyes. Ún dellos ye un frutu partenocárpicu, el que paez una guindilla.

L'añu pasáu ún de los dos Pissardi, el más cercanu al centru, estuvo especialmente cargáu d'esos frutos apaecíos a les guindilles (ver los ensiertos del 10/04/11 y 11/04/11). Durante un tiempu nun supimos qué yera, hasta que nos lo aclaró don Álvaro J. Morilla Fernández, un inxenieru agrónomu padre d'una escolina de 2º bachiller del añu pasáu (a la que, por cierto, saludamos dende equí y deseámos-y ésitos nos sos estudios). L'aclaración que nos fizo fue que son frutos que crecen ensin semilles fertilizaes, pero que siguen creciendo poles ausines, les hormones que faen crecer los frutos normales.