Estimaos amigos
(el morfema –os,
estimada Nieves
y otres tantes cuales,
tamién estimaes,
ensierta el d’-es,
asina que, ñeñes,
olvidái les quexes).
Queríos amigos,
Dígolo otra vez,
Nesta coyuntura
Onde la campana
Llama pal retiru,
(digo´l de mio casa,
Nun digo esi parque
Que hai per Madrid,
Que si fuere’l casu,
Equí hai otru al llau,
Más guapu y más netu,
Col kilometrín),
Pal retiru llama,
Digo, la campana
Col so lloquerín,
Quiero agradecevos
La vuestra compaña
Toos estos años
—anden pelos trenta
Si deos nun fallen
Al echar la cuenta—,
La vuestra compaña
Y la vuestra amistá:
De toos vosotros,
Los que trato menos,
Los que trato más:
Los del café diariu,
Los que nos reunimos
Nel departamentu
Pa discurrir cómo,
Igual que’l maná,
Podemos facer
Sobre los alumnos,
Trabayu y esfuerzu
Facer amiyar,
Y, pues nun podemos,
Siempre nos quexamos
Y un añu tres otru
Ensin escarmar,
Rompemos la tiesta
A ver si podemos
Milagros llograr;
Del departamentu,
Los qu’agora tamos,
Los que nel pasáu
Tuvisteis tamién.
De les direcciones
(los cabezaleros
Y los secretarios
Y xefes d’estudios),
Que tantu esbrexaron
Por llevar el centru
Un pocu derechu,
Deprendiendo tarde
Que ye duru intentu
Que vien resultar,
Más o menos siempre
Como’l propiu intentu
De querer coyer
Agua con un cestu
O piescar n’El Piles
Centollos o ñocles
O aumentos de sueldu.
A toos vosotros,
Los que trato más,
Los que trato menos,
Los que discutimos
O apenes falamos,
Gracies de verdá,
Yá pola amistanza,
Yá pola compaña,
Yá pola presencia.
Y más si tenemos
En cuenta contada
Qu’en toos estos años,
(Non estos dos últimos:
Décades y décades),
Dende años y paños,
L’alministración
Y tolos gobiernos,
Van, ¿cómo lo diría?
¿poniéndonos puntos?
¡Eso pu…nteándonos!:
Menos vacaciones,
Más hores nel centru
Nun faciendo nada
(nada… o más papeles
Que pa nada valen),
Y ¡venga conceyos
Y hala reuniones,
Y más papelinos
Y programaciones!,
Que valen lo mismo
Pal centru l’asuntu
—enseñar al neñu,
formar les persones—
que tar muertu fame
y envede comer,
rascar… los…
Co.. nesto termino:
A toos vosotros:
Amigos, amigues,
Casaos o solteros,
Los yá xubilaos,
Los que vais comigo,
Los qu’equí se queden,
Los que mandu tienen,
Los que nun lu tienen:
A toos, amigos,
Gracies perenceses
Güei tó yo davos,
A toos vosotros:
Pola compañía
y pola amistanza
y pola palabra
y pola presencia.
Porque así, na marcha,
el nuevu camín
Nun se fadrá pindiu
Nin llargu nin duru,
Como si al Retiru,
Allá en Madrid,
Tuviera que dir,
Sinón llanu y fácil,
Como si corriese
Pel kilometrín.
No hay comentarios:
Publicar un comentario