Santa Llucía: refranes de la lluz y felicidaes

Felicidaes a toles Llucíes, Lucíes, Luchis, Lucías, etc.

Y a propósitu, vamos recordar el refrán, que tien que ver col solsticiu d'hibiernu. Nun hai qu'escaecer que santa Llucía ye la patrona de la vista (represéntasela colos güeyos nun platu, enseñando les señales del so martiriu) y, polo tanto, de la llume.

Hasta santa Llucía, crez la nueche y mengua'l día. De santa Llucía a Navidá nel so ser está. De Navidá enriba crez el día al pasu la gallina.

Oliu de Iacopo Palma "Il Giovane". Atópase en Venecia, na ilesia de los santos Xeremíes y Llucía

Bueno, nun ye satamente asina. Efectivamente, de güei pa mañana ponse'l sol 1 minutu más tarde. El segundu minutu que crez ye'l día 21. Pal 31 yá se retrasa'l trapecer 10 minutos al respective'l día de güei, 13, santa Llucía.

Pela mañana, ensin embargu, el día sigue amenorgando. Si güei, día 13, martes, amanez a les 8,47, el día 31 risca a les 8,56, 9 minutos más tarde. Esto ye, de güei 13 al 31 entovía se pierde un minutu de llume, ente lo que se gana pela tarde y lo que se sigue perdiendo pela mañana.

De fechu, hasta pasao Reis, el 10 de xineru, nun ganamos un minutu al riscar. Ye esi día'l 10, el primeru qu'avanza un minutu. Risca a les 8,55. Como se ve, dende'l 31 d'avientu de 2016 hasta'l 10 de xineru de 2017, el sol sigue llevantándose, el perezosu d'él, a les 8,56 toos esos díes.

De toes maneres, como aprosimación y pa tar fechu'l cálculu a güeyu, la tradición facíalo abondo bien col refrán.