Tengo qu'anular una reserva que fice a través de Booking.com, piérdome pela páxina y nun doi col sitiu p'anular una reserva. Decido buscar el teléfonu p'anulala per esi mediu y salme un 11887 que pon "anulación reservas Booking". Infórmenme que la llamada son 0,63 céntimos pela instalación, y 0,05 por segundu. Tarden un migayín. Ponse la operadora, faeme esperar otru migayín y aclárame que nun pue facer otra cosa que dame'l teléfonu de Booking, que, si quiero, que me ponen con ellos. Yá ven la estafa. Naturalmente, cuelgo.
Decido llamar, al final, al hotel y facer l'anulación ellí. Tómenme nota y pídenme por favor que l'anule yo tamién en Booking, que si non a ellos cóbren-yos igual la comisión.
Ún ye un paisanu antigu, asina que vuelvo a la páxina de Booking y por fin topo ónde anular, na parte embaxo del too. Póngome a ello y pídenme que lo faga a través del corréu o de facebook, autorízándolos a facese colos mios contactos.
Naturalemente, nun acepto. Escueyo llamalos per teléfonu (912768614). Toi llamando más de cuatro minutos: los operadores nun tán disponibles. Cuelgo, ente'l desesperu y el sospechar una estafa (Cuando vea la factura yá-yos diré si efectivamente ye una estafa).
Vuelvo rebuscar y consigo por fin anular la reserva na páxina web de Booking. Si nun m'enquivoco, nel mesmu sitiu onde enantes me pedíen la llista de contactos de facebook y mail.
Fecho y confirmada la reserva per corréu, llamo al hotel pa contá-yoslo too. Lo que me diz la persona que m'atiende ye que ye asina siempre. Que en Booking sólo tienen dos operadores al teléfonu y que, pa enriba, nada más trabayen peles tardes.
Esto ye too, que nun ye meruxa.
No hay comentarios:
Publicar un comentario