Una mierdina

Matrícula d'un nietu pa los cursos de veranu (trabayen los dos pás). 

De mano, faese complicadísimo seguir los trámites per interné, y entrugo yo que cómo será pa munchos ciudadanos. En tou casu, una vegada matriculáu condicionalmente de mou presencial, hai que dir a pagar a Cajastur (Liberbank) o  facelo per interné.

Son 9 pagos. Pues bien, pa facelo hai que tramitar caún de los pagos per separao y eso salvando delles dificultaes conceptuales. Per exemplu: el documentu de pagu pon "mes", "año", ensin más desplicaciones. Hai qu'aldovinar que se trata del mes y del añu nos que caduca la tarxeta.

Reblagada la dificultá, hai que dir rellenando'l documentu de pagu colos números de la tarxeta y l'añu de caducidá d'un nún, ensin que puedan pagase conxuntamente, pero tampoco ensin que la páxina na qu'estás guarde memoria de lo qu'acabes de meter, de mou y manera que, a cada pagu, tienes que volver a rellenar los datos.

Naturalmente, tien ún que quedase con un resguardu del pagu, por si acasu. Son nueve impresiones, una por cada pagu. De mou que, amás del gastu de tiempu, ta'l desperdiciu de papel y el gastu tinta, que, por ciertu, aumenta porque hai que imprimir dos reserves de matrícula más (yá nun había places a les 9 la mañana en dalgunos cursos), que suponen dos fueyes más por caúna, dos fueyes más de les cuales la segunda nun diz nada, pero sal impresa.

¡Vaya mierdina esto de les páxines n'interné del Ayuntamientu Xixón! 

¡Ah, y esperes! Volví pa un cambéu a les 9,30 y a les 10,30 tenía 20 entovía númberos delantre. Ta too fecho pa la xente que nun trabaya (y que tien muncha paciencia y ta bien de la espalda y los cadriles).