Esto ye un avión de xuguete, fechu de porespán. Tien 68 cm de llargo por 86 d'envergadura. Faise volar tirándolu cola mano. Si se consigue que vuele (lo más normal ye que capote nada más llanzalu), puede recorrer unos tres o cuatro metros a una altura d'ente un metro y tres.
Y agora, la historia. Campus de Xixón, Viesques. Un prau. Segunda quincena de xunu. 6 y picu la tarde. Un neñu de seis años, una madre y dos güelos. Tán col neñu pa que s'entretenga faciendo volar l'avión. Al pocu, apaez un de la empresa de seguridá del campus. Que nun se podíen volar aparatos nel Campus. Repito, lliteral, "que nun se podíen volar aparatos nel Campus". Tratamos de facelu ver qu'aquello nun yera ningún "aparatu" (probablemente, pa entender la cuestión hai que señalar que nel pasáu los aficionaos al aeromedelismu teníen el so campu d'entretenimientu ellí mismo, agora yá nun se los ve perillí).
Al ver lo que yera l'aparatu y al da-y desplicaciones nosotros, qu'aquello nun yera ningún "aparatu", que yera un xuguete infantil, a l'home dio-y un poco d'apuru, y despliconos que nun yera cosa d'él, que lu acababen de llamar d'ellí (y señalónos l'edificiu) pa que nos vinieren a echar.
Como la cosa taba como taba, y yá que somos xente educao y, per otru llau, el neñu taba ente sorprendíu y esmolecíu, decidimos marchar.
En fin, espero que too fuere un escesu de celu de dalgún directivu o profesor del campus, y non una percepción errónea de la realidá (que too puede ser), porque de ser esto último, diría poco del que llamara y desplicaría delles de les carencies de la nuestra Universidá.
Con too y con ello, una ridiculez. Y, por cierto, dexo de llau dalgunes consideraciones de mena llegal y xurídica.
68 de llargo por 86 d'envergadura
No hay comentarios:
Publicar un comentario